Suenter la renovaziun da l’onn 2021 ha la fundaziun ch’è possessura da l’hotel e restaurant Piz Mitgel cuntinuà sco manaschi da l’entir onn. En il decurs dals emprims onns saja dentant sa mussà ch’il hotel ed il restaurant hajan memia bassas frequenzas en la stagiun morta, di Luzi Thomann, il president da la fundaziun che ha cumprà e renovà il hotel a sias uras. E perquai haja il cussegl da fundaziun decidì ussa da serrar l’hotel durant trais enfin quatter mais l’onn, durant la stagiun morta.
Cundiziuns da rom pli difficilas
En discurs cun la FMR ha Luzi Thomann ditg che las cundiziuns da rom na sajan betg daventadas pli simplas ozendi. «Ils contracts collectivs ed ils temps da lavur ston vegnir suandads precis. Er ils custs da persunal èn in grond tema oz en la gastronomia.» Quai haja sfurzà il cussegl da fundaziun da reagir. Il cussegl da fundaziun saja stà da buna speranza ch’i saja pussaivel da tegnair avert l’hotel l’entir onn, di il president da la fundaziun. Ma las sperditas sajan memia grondas. «Cuntinuar uschia pudain nus be, sch’insatgi paja la sperdita dals mais tranter la stagiun.»
Il cumportament dal consument è sa midà
En la gastronomia vegnan ils mais cun pauca svieuta numnads ils mais flaivels. Quai èn per regla l’avrigl ed il matg e lura il november enfin Nadal. Quels mais resta er l’Hotel Piz Mitgel cun pliras chombras, duas suitas ed in’abitaziun da vacanzas serrà a partir da questa primavaira. Luzi Thomann di ch’el deploreschia las midadas. Quellas hajan dentant da far cun la midada dal cumportament da las consumentas e dals consuments. Quellas midadas pertutgian er auters lieus turistics. «En la stagiun morta èn las ustarias vidas la saira a las diesch.»