- L'hotel Cube a Savognin è dapi var 6 onns serrà .
- Iniziant, possessur e l'investur austriac Rudolf Tucek ha adina puspè chaschunà lingias grassas en connex cun l'hotel pervi da daivets e dispitas .
- Las mesiras spetgadas da la dretgira regiunala Alvra sajan vegnidas liquidadas , uschia che la Societad S1 Hotelerrichtungs AG è puspè giuridicamain capabla d'agir per l'hotel Cube.
- La societad S1 Hotelerrichtungs AG s'inscuntra ils 6 da december davant la dretgira regiunala d'Alvra cun las pendicularas per sclerir dumondas avertas che pertutgan pretensiuns da raps e fittaziun.
Dapi var sis onns – cun ina curta interrupziun enturn il 2020 – è l'hotel cun fin a 250 letgs dasper la staziun a val da las pendicularas da Savognin serrà. Iniziant e possessur è l'investur austriac Rudolf Tucek. Adina puspè ha el chaschunà lingias grassas en connex cun l'hotel pervi da daivets, dispitas e differentas opiniuns tranter el e la vischnanca da Surses ubain las pendicularas.
Perquai che Rudolf Tucek n'ha dapi onns betg pli organisà radunanzas generalas per s'occupar cun ils problems da l'hotel, ha la finala era la dretgira regiunala d'Albula/Alvra stuì intervegnir. La dretgira ha pretendì che la societad d'aczias da l'hotel resolva divers puncts fin ils 11 da november – uschiglio spetgia la liquidaziun. Las mesiras spetgadas sajan vegnidas liquidadas, ha il president da la dretgira regiunala Alvra detg sin dumonda dad RTR.
La situaziun resta intscherta. Quai ch'è cler uschè lunsch: La Societad S1 Hotelerrichtungs AG - ch'è gestiunaria da l'hotel Cube - ha la finala tegnì ina radunanza suenter l'avis da la dretgira. Ed era l'adressa da la S1 Hotelerrichtungs AG è vegnida inditgada danovamain en il register da commerzi, ha il derschader regiunal da la dretgira d'Alvra confermà. Quests pass eran necessaris per che la societad è insuma puspè giuridicamain capabla d'agir per l'hotel Cube.
Rudolf Tucek – ch'è tenor il register da commerzi vinavant il president dal cussegl d'administraziun – n'era dentant betg cuntanschibel per RTR per ulteriuras dumondas davart plans per il futur da l'hotel. Cler è, che la societad S1 Hotelerrichtungs AG s'inscuntra ils 6 da december davant la dretgira regiunala d'Alvra cun las pendicularas per sclerir dumondas avertas che pertutgan pretensiuns da raps e fittaziun, quai tenor la pagina uffiziala da la dretgira regiunala d'Alvra e las explicaziuns dal president da la dretgira. Cunquai che la societad è puspè capabla d'agir, èsi numnadamain er puspè pussaivel da citar ella davant dretgira.
Dapi onns naginas radunanzas generalas pli
Punct decisiv per la dretgira d'intervegnir è che la gestiunaria da l'hotel – la firma da Rudolf Tucek – n'è giuridicamain betg stada abla d'agir perquai ch'i n'ha dapi onns betg pli dà ina radunanza generala sco la lescha ed ils statuts da la fatschenta prescrivan. Era Tucek sez sco cusseglier d'administraziun avess da vegnir (re-)elegì mintg'onn da la radunanza generala. Plinavant hai era dà difficultads da communitgar cun la gestiunaria perquai che la posta n'arrivava betg e returnava u vegniva manada enturn fin en l'Austria. Ina situaziun che n'è tenor la dretgira betg acceptabla per ina firma cun sedia en Svizra. I sto esser pussaivel da trametter posta ad ina firma e ch'igl haja là era persunas che possian prender encunter quella, p. ex. brevs enscrittas.
Rudolf Tucek è dapi la fin dals onns 1970 activ en la branscha da turissem. El ha gì ed ha divers posts en firmas ed organisaziuns turisticas da l'Austria, p. ex. è el stà CEO e directur da la Vienna International Hotelmanagement AG cun manaschis d'hotellaria en differents pajais.
Tenor atgnas indicaziuns è el dapi il 2004 svilupader dal concept da Cube. Quai èn hotels sco quel a Savognin cun ina purschida e structura innovativa ed attractiva cunzunt per in public giuven (sco p. ex. cun ina paraid da raiver u ina zona da gieus e divertiment entaifer l'hotel).
Adina puspè pon ins però era leger en artitgels da differentas opiniuns u dispitas enturn el e ses posts.
Or da l'archiv
Il 2005 è l'hotel Cube vegnì construì cun in nov concept cunzunt per la clientella giuvna. Il 2018 èn las portas lura sa serradas per l'emprima giada pervi da daivets ed ina dispita giuridica cun las pendicularas.
La fin il 2018
Il 2020 lura la reavertura sco hotel da garni. Ed il 2022 lura la communicaziun ch'ins na possia betg cuntinuar cun il manaschi pervi da la pandemia da corona – fin tar il cas da dretgira il 2024.