Sandro Zollinger (44) – il nov directur da l'Hotel Jufa – vul avair dapli giasts da l’exteriur en l’avegnir. In’autra finamira è d'occupar meglier l'hotel durant la stad. Plinavant duess vegnir rinforzada la raziunalitad e la persistenza.
Dapi il fanadur 2024 è Sandro Zollinger directur da l'hotel da trais stailas. Avant ha il Svizzer manà durant tschintg onns l’Hotel Bellevue a Tagn/Wiesen, Tavau. Schegea che l'Hotel Jufa marscha bain l'enviern, è la stad anc sitga. Zollinger vul perquai carmalar dapli glieud durant ils mais da stad e d'atun en l’hotel. La stad na marschia anc betg sco giavischà, ha Zollinger ditg sin dumonda.
1 / 5
Legenda:
L'Hotel Jufa ha er ina sauna.
RTR
2 / 5
Legenda:
L'entrada da l'hotel.
RTR
3 / 5
Legenda:
L'hotel è vegnì construì da la firma Uffer da Savognin.
RTR
4 / 5
Legenda:
Sandro Zollinger è dapi il fanadur il nov directur da l'Hotel Jufa.
RTR
5 / 5
Legenda:
La chasa ch'è en construcziun porscha a partir da l'enviern proxim 12 abitaziuns che pon vegnir reservadas sur l'Hotel Jufa.
RTR
Actualmain derivia la gronda part dals giasts da la Svizra. Era quai spera Zollinger da pudair midar en l'avegnir cun carmalar dapli giasts da l’exteriur. En mira haja el en in emprim pass l’Engalterra ed ils Stadis Unids da l'America. En in segund pass veglia Zollinger lura rinforzar la reclama en ils pajais da Benelux e da la Scandinavia.
audio
Hotel Jufa ha plans per l'avegnir
02:43 min, ord Actualitad dals 30.09.2024.
Maletg: RTR
laschar ir. Durada: 2 minutas 43 Secundas.
Partenadi cun club da golf
Da nov datti er in partenadi cun il club da golf d’Alvagni. «Quest partenadi è in exempel perfetg per pudair porscher a noss giasts ina plivalur supplementara ed il medem mument augmentar l'attractivitad da l'entira regiun», declera Zollinger. In’auter partenadi ha l'hotel cun il Parc Ela. A partir da l'enviern proxim administrescha l'Hotel Jufa en pli 12 abitaziuns da vacanzas visavi da l'hotel. I sa tracta d'ina construcziun nova cun segundas ed emprimas abitaziuns.
Fundaziun maina hotels
Avrir la boxSerrar la box
L'Hotel Jufa (Jugend und Familienhotel) a Savognin è vegnì inaugurà l’onn 2021. En l’entira Europa datti dapli che 60 hotels che tutgan tar la medema chadaina. Quai en l’Austria, en Germania ed a Malbun en il Principadi da Liechtenstein. Il sulet hotel en Svizra è a Savognin. Proprietari n'è betg in concern u in interprendider privat, mabain la fundaziun austriaca privata d'utilitad publica dals hotels JUFA. Ella dumbra radund 1,6 milliuns pernottaziuns ad onn. Cifras da pernottaziun be da Savognin na communitgescha la fundaziun betg.
