Il recurs che Helvetia Nostra aveva fatg encunter il project turistic Viols a Savognin è giud maisa. Il Tribunal federal ha renvià quest.
Marcel Friberg, in dals iniziants dal project e manader da fatschenta da la Resalpina GmbH che vul realisar il project, è cuntent, ch’ins possia ussa realisar il project. Ils divers recurs ch’igl haja dà hajan retardà il project per quatter onns, ma ussa saja ins pront da far ils plans finals per il project.
La lubientscha da bajegiar saja ussa valaivla, e probabel possia ins la primavaira da l’auter onn entschaiver a bajegiar. Cun ils investurs che sajan avant maun prendia ins ussa si contact. Tgi che vegnia a manar las abitaziuns da vacanzas cun radund 450 letgs, na saja betg anc decidì. Quai vegnia fatg ensemen cun ils investurs.
Igl vegn a dar 80 abitaziuns administradas. Oriundamain è er stà planisà ina tur cun ascensur che vess collià il Lai Barnagn cun las abitaziuns. Ina part dal project èn er ina recepziun, ina zona da wellness ed in club per uffants.
L'istorgia davart ils recurs
Igl è gia la segunda giada ch'il project turistic Viols è vegnì tractà dal Tribunal federal. Encunter il project inoltrà il 2019 aveva la Helvetia Nostra fatg recurs cun la argumentaziun ch'i haja dà sbagls formals e che la lubientscha che la vischnanca da Surses ha dà al project saja d’annullar.
Suenter ch'il cas è ids duas giadas tranter la Dretgira administrativa dal chantun Grischun ed al Tribunal federal vi e nà vegn lezza ussa en sia segunda decisiun a la conclusiun che las proceduras sajan vegnidas tegnidas en. En sia argumentaziun scriva il Tribunal federal che damai ch'ils investurs desistian ussa da bajegiar la tur cun ascensur, e cun quai crodia il sulet punct dispitaivel dal project davent, uschia ch'il recurs vegnia renvià.
Ulteriurs protests
Cunter la construcziun dal projet turistic Viols a Savognin aveva dà ina protesta l'onn 2019. Objecziuns ch’en numnadas en la protesta da cunfinants eran l’access al resort da vacanzas e la canera dal traffic. La Dretgira administrativa dal chantun Grischun era dentant sa decidida da dar vinavant la lubientscha da bajegiar Viols.
