Tabella 3. liga regiunala
Sco gia la stagiun passada n'ha l'US Schluein Glion laschà nagina schanza al vischin, il CB Trun/Rabius. La finala èsi stà ina clera chaussa cun 5:1. Decidì quest emprim derbi da la stagiun ha cunzunt Lars Caduff. Il capo-tiragols da Schluein ha sajettà gist trais gols suenter pausa ed uschia realisà in hattrick.
Durant las emprimas 45 minutas n'hai dà nagins gols. La gronda schanza avant la pausa ha gì Schluein Glion gia en la segunda minuta. Il goli da Trun, Livio Lozza, ha però mussà ina parada miraculusa ed uschia evità ch'il favurit giaja gia baud en avantatg. Suenter la pausa èsi dentant reussì a l'USSI dad ir en avantatg, quai entras in gol da Gian Sgier en la 48avla minuta. Curt suenter ha Lars Caduff tuc al 2:0 (51avla minuta) ed al 3:0 (56avla minuta). En la 69avla minuta èsi reussì a Patrizio Decurtins da scursanì al 1:3 ord vista da Trun/Rabius. Cun il 4:1 en la 83avla minuta ha Ronny Casutt però fatg tut cler. La finala ha Lars Caduff anc tuc al 5:1 en la 91avla minuta.
En la tabella resta l'US Schluein Glion sin il segund plaz, uss cun 19 puncts ord 10 gieus. Il CB Trun/Rabius ha vinavant 13 puncts e sa chatta amez la tabella da la 3. liga. En in'emna spetga la davosa runda d'atun. Omaduas equipas sursilvanas dattan ordaifer, il CB Trun/Rabius encunter il FC Triesen e l'US Schluein Glion encunter il FC Panaduz.
Situaziun da partenza
L’US Schluein Glion è er questa giada stada en la rolla da favurit. La situaziun, cumparegliada cun ils davos duels, è dentant sa midada. Entant che Trun/Rabius ha cumenzà detg stupent la nova stagiun 2024/2025 èn ils da Schluein Glion stgarpitschads in pauet durant questa runda d’atun. Il dischavantatg sin l'emprim da la gruppa Bogn Ragaz muntava suenter 9 rundas gia ad 11 puncts e l’avantatg sin il CB Trun/Rabius è stà sulettamain 3 puncts.
USSI gist ad uras en furma
Las raschuns pertge che l’US Schluein Glion haja pers blers puncts quest onn sajan differentas, di il nov schef-trenader Mirco Zala. Per l’ina hajan ins in nov staff, quai che dovria ses temp enfin che mintgin sappia tge, co e cum, per l’autra saja vegnì engaschà plirs giugaders giuvens cun anc pauca experientscha en la 3. liga. Lura hajan els gì divers giugaders che sajan stads blessads gist al cumenzament da la stagiun ed en ina u l’autra situaziun haja franc er il cletg mancà, uschia Mirco Zala.
Ils da Schluein Glion paran dentant d’avair chattà la via enavos al success, quai gist en il dretg mument en vista al derbi cunter Trun/Rabius. Ils davos dus gieus da campiunadi ha l’equipa da la Foppa numnadamain gudagnà cleramain, ina giada cunter Walenstadt cun 5:0 ed il davos cunter Mels cun 4:0.
I fiss stà quasi in success istoric
Cun ina victoria en l’Arena Crap Gries a Schluein avess il CB Trun/Rabius schizunt surpassà l’equipa da la Foppa en la tabella. Ina schanza gia quasi unica. La davosa giada che Trun/Rabius ha però battì l’emprima equipa da Schluein Glion giascha enavos decennis. En quest millenni n’è quai insumma anc mai capità, quai dentant er perquai che las duas equipas han giugà durant blers onns en ligas differentas. L'ultima giada che Trun/Rabius ha gudagnà almain in punct cunter Schluein Glion è stà l’avrigl 2023. Lura avevan ils da Trun/Rabius giugà a chasa pari 1:1.
Impurtant saja cunzunt da giugar fitg bain e stabil en la defensiva sco durant ils davos trais gieus da campiunadi nua che Trun/Rabius ha incassà gnanc in gol, e lura forsa decider il gieu cun in conter u l’auter, uschia il trenader dal CB Trun/Rabius, Claudio Bundi avant il gieu. En mintga cas na vulevan ils da Trun/Rabius betg anc ina giada vegnir terrads sco la davosa giada.
