Far il pass enavos en la 2. liga regiunala, quai è la finamira da l’US Schluein Glion. Suenter la runda d’atun vegn quai dentant grev. Durant ch’il Sursilvans han tranter auter pers trais gieus, quai encunter Schaan, Mels e Cuira, ha il leader da la tabella, il FC Schaan gudagnà tut ils 11 gieus. L’equipa dal Principadi dal Liechtenstein che valeva sco in dals gronds favurits en questa terza liga n’è betg stada da franar e po uschia ir en la pausa d’enviern cun in avantatg confortabel dad 11 puncts sin Schluein Glion, l’equipa dal trenader Patric Casutt.
Era sch’i vegni grev, quasi betg pussibel, stoppia l’equipa tuttina crair vidlonder e mirar da gieu tar gieu en la runda da primavaira, uschia Rafael Deplazes, in dals capo-attatgaders da l’US Schluein Glion. Er betg dal tut cuntent astga l’equipa da la Foppa esser cun la Cuppa grischuna ch’è ida a fin gia en il quartfinal. Là ha Schluein Glion, il defensur dal titel, pers a chasa encunter Domat cun 3:5.
Trun/Rabius sto tremblar vinavant
Il CB Trun/Rabius terminescha la runda d’atun sur il stritg, la reserva sin in plaz da relegaziun munta dentant be ad in sulet punct. L’equipa da la Cadi ha gudagnà be 3 dad 11 gieus ed uschia recaltgà be 10 puncts. A Trun/Rabius ha dentant er pliras giadas il cletg mancà, uschia che plirs gieus èn ids a fin cun ina terrada cun be in gol differenza, uschia era il davos gieu encunter Cuira 97 (1:2).
Er sch’il nov trenader Claudio Bundi vess spetgà in meglier resultat en la tabella è el cuntent cun il svilup da sia equipa giuvna.
Auter che Schluein Glion è Trun/Rabius però anc da la partida en la Cuppa grischuna. Là ha l’equipa da Claudio Bundi cuntanschì il mezfinal. Cun Domat spetga lura en quest mezfinal ch’è planisà ils 1 d’avrigl in’ulteriura equipa da la 3. liga.
Runda da primavaira cumenza cun il derbi sursilvan
Cun il campiunadi da ballape en la terza liga vai vinavant ils 7 d’avrigl 2024. Gist en l’emprima runda spetga gia il derbi sursilvan tranter il CB Trun/Rabius e l’US Schluein Glion, ina affischa tut speziala. Igl è il duel tranter las duas actual pli fermas equipas da ballape en Surselva.
