US Schluein Glion - Nova stagiun cumenza cun nov trenader

Mirco Zala, il nov trenader da l'emprima equipa da Schluein Glion, è creschì si a Domat. Tar il CB Domat ha el giugà ballape e suenter ses temp sco activ trenà equipas da juniors dal club. Mirco Zala viva dentant gia blers onns cun sia famiglia a Trin-Mulin. Dus da ses trais figls giogan en l'equipa da terza liga da l'USSI. E sco il nov a la lingia ha raquintà tar nossa visita ad in trenament, hajan ses figls stuì dar lur consentiment, uschiglio n'avessi el betg surpiglià il post da scheftrenader.

Sia motivaziun saja gronda da pudair lavurar cun l'emprima equipa da l'USSI, ch'è cun ina media da vegliadetgna dals giugaders da 21 onns, fitg giuvna. Mirco Zala è persvadì dad era pudair dar novs impuls e furmar in'equipa cumpetitiva che dat in ballape attractiv.

«Prender emna per emna» è ses motto. E suenter che l'equipa ha terminà l'ultima stagiun sin il segund plaz en terza liga, vul era il nov scheftrenader, ch'il club da la Foppa gioga sin in plaz davantvart. Per Mirco Zala èsi stà impurtant che Patric Casutt, ch'è stà l'ultima stagiun scheftrenader, daventia trenader assistent.

In giuven e pli grond cader

A la fin da la stagiun n'han nagins giugaders bandunà l'emprima equipa da l'US Schluein Glion. Anzi cuntrari, il club ha pudì engaschar tschintg giugaders novs. Tuts derivan da l'U18 dal team da la Svizra Sidorientala. Urs Casutt, il schef da sport, declera ch'integrar ed era laschar giugar giuvens da la regiun saja uss gia intgins onns la strategia da l'USSI. I dovria ina buna maschaida tranter giugaders rutinads cun experientscha ed ils pli giuvens che vegnian successivamain integrads. Gist perquai che Mirco Zala haja gronda experientscha cun juniors vegni quai da bun a l'entir svilup da l'equipa. Plinavant quinta il schef da sport ch'il nov vegni a purtar enavant l'equipa che dumbra 26 giugaders.

Il nov e sia nova sfida

L'emprim gieu da la nova stagiun dat l'US Schluein Glion ordaifer encunter Bogn Ragaz (17-08 a las 17:00 uras). Ils Songagliais han gì terminà il campiunadi sin il terz plaz, be 1 punct davos ils Sursilvans.