I na vegn betg pli simpel en quest mument ch'ins na po betg metter sin cuntinuitad. Tut auter che simpla è la stagiun passada stada per il CB Trun/Rabius ch'è stedi stà sut squitsch per evitar la relegaziun. Surtut la runda d'atun n'è betg gartegiada. La primavaira èn alura sa resultads dapli puncts e fin la fin dal campiunadi era l'equipa bain be gist sur il stritg, dentant cun in pulit avantatg da puncts sin ils dus clubs ch'èn vegnids relegads.
A la fin dal campiunadi han lura plirs giugadurs da tschep e cun gronda experientscha bandunà il club. Terminà dal tut da dar ballape u midà en ina liga pli bassa. Al trenader Claudio Bundi èsi reussì d'engaschar numerus giugadurs novs. Surtut giuvens. Uschia che ses cader dumbra uss 21 giugadurs. In bun dumber sche nagin sa blessescha, di il trenader che cumenza sia segunda stagiun a la lingia dal CB Trun/Rabius.
La media da vegliadetgna dals giugadurs è tranter 20 e 21 onns. Claudio Bundi è conscient ch'i dovra temp e pazienza per integrar ils giuvens e laschar chattar els lur plaz ed il ritmus en terza liga ch'è pulit pli svelt. L'engaschament, ubain dals giuvens sco dals pli vegls, saja grond, di il trenader. Ina buna maschaida.
En quest mument che l'equipa è anc ina giada vegnida pli giuvna stoppian uss surtut ils giugadurs mesauns (quels da 22 e 23 onns) surpigliar dapli responsabladad sin il plaz.
Las spetgas dals novs giugadurs
Tranter ils pli giuvens en il cader dal CB Trun Rabius èn Nico Caduff e Livio Lozza. Nico ha 18 onns e stat avant sia emprima stagiun en terza liga. El sa legra e spera da survegnir inqual schanza da pudair star sin il plaz. Per sa sviluppar saja impurtant da pudair giugar e far experientschas.
Ses plaz fix en mintga gieu ha Livio Lozza. Cun be 17 onns è el il nov goli numer 1 dal CB Trun/Rabius. Ins senta il levgiament tar l'equipa da finalmain avair chattà ina schliaziun sin la posiziun dal goli. L'onn passà èn era adina puspè giugadurs stads en il gol.
Livio Lozza spera da pudair esser per ils giugadurs quella pitga ch'i dovra davostiers per dar ina tscherta segirtad. Impurtant è che questa posiziun survegn uss cuntinuitad.
Restar en terza liga
Cun ils trenaments, las preparativas ed ils gieus da test è il trenader cuntent. Encunter l'equipa da Panaduz ch'è vegnida relegada la fin dal campiunadi en terza liga, hai dà ina victoria da 3:1. Era l'emprim gieu da la Cuppa grischuna è gartegià cun batter ils Lusitanos da Samedan. Quella cuppa grischuna, nua ch'ils Sursilvans èn stads en il final e pers piz a cup il cumbat per il titel e la trofea. Era quest onn vulan ins empruvar da restar uschè ditg sco pussaivel en il turnier.
Prioritad ha sa chapescha il campiunadi en terza liga. Bain savend che la stagiun vegn tut autra che simpla, vul il CB Trun/Rabius sa tegnair en questa liga era a la fin da ses 6avel onn en roda en terza liga.
La nova stagiun cumenza cun avantatg da chasa. Ils da Trun/Rabius retschaivan dumengia (18-08, 15:00 uras) il club dal FC Mels sin lur plaz a Pustget.
