423 aspectaturas ed aspectaturs han vis in emprima mesadad cun clers avantatgs per la US Schluein Glion. Lars Caduff ha sajettà en avantatg l'equipa da chasa suenter in bellezza assist da Rafael Deplazes - quai en la 17avla minuta. En la 37avla minuta è el sa mess tras ed ha sajettà il 2:0 suenter in corner. Avant la pausa ha Trun/Rabius strusch fitga pe e gì schanzas da gol.
En la segunda mesadad han ils fans vis tut in auter gieu. L'equipa da la Cadi ha era chattà schliaziuns en l'offensiva ed avess pudì sajettar spezialmain enturn la 60avla minuta l'emprim gol. Cun in zic cletg ha la USSI dumagnà questa fasa senza cuntergol. Tranter auter ha il CB Trun/Rabius survegnì in culp liber indirect en la zona da puniziun. Tar quest'acziun ha in giugader da Schluein pudì frenar il bal sin lingia cun ses schanugl. Curt avant la fin dal gieu ha lura Livio Derungs auzà sin 3:0 cun in bel volley suenter in culp liber.
Ina carta cotschna la fin dal gieu
Bun 10 minutas avant la fin hai anc dà in zic hectica a Crap Gries. Suenter in foul d'in giugader dal CB Trun/Rabius encunter Rafael Deplazes, fin là probabel il meglier giugader sin il plaz, ha lez tutgà cun ses pe da gugent la fatscha dal adversari e survegnì uschia la carta cotschna. Sin il gieu sco tal n'ha questa carta cotschna dentant betg pli gì ina gronda influenza.
La US Schluein Glion ha gudagnà quest derbi grazia ad ina ferma emprima mesadad. Al CB Trun/Rabius ha spezialmain er en la segunda mesadad in zic il cletg mancà per chattar la via enavos en quest gieu.
Uschia resta la US Schluein Glion vinavant sin plazza dus da la tabella ed il CB Trun/Rabius è glischnà dal penultim sin l'ultim plaz da la tabella.
