5 etappas - 341 kilometers: Dals 20 fin ils 24 d'avust 2024 ha gì lieu il Swiss Epic – la cursa da mountainbike tras il Grischun. Durant tschintg etappas han participantas e participants en mintgamai teams da dus gì d’absolver passa 340 kilometers cun radund 11’400 meters d’autezza. L’etappa roiala ha spetgà il segund di. Lura è vegnì bandunà l’Engiadina direcziun Tavau, in’etappa sur 81 kilometers cun 2'550 meters ensi. Questa etappa ha manà tranter auter sur il Pass dal Scaletta, cun 2'606 meters sur mal il pli aut punct dal Swiss Epic 2024. La quarta etappa ha manà quest onn da Tavau en la chapitala grischuna a Cuira, in’etappa cun 3'350 meters descensiun. A fin è il Swiss Epic – sco ils davos onns – ì a Tavau.
Gian Schmid e Lukas Flückiger gudognan il Swiss Epic 2024. Ursin Spescha e Simon Walter vegnan terzs en il classament general. Lorenzo Samparisi e Nicolas Samparisi daventan segunds en ina da las pli diras cursas da mountainbike dal mund.
Er in star or d'in auter mund sportiv è stà da la partida al Swiss Epic. Cun in retard da bundant duas uras sin il team victur ha Sebastian Sprater finì cun ses cumpogn la cursa da mountainbike. «Jau gieva pli baud gia bler cun velo e la sfida m'ha fatg quaidas», di Sprater ch'ins enconuscha da la furmla 1 sco Sebastian Vettel.
Il pilot da cursa da la furmla 1 demissiunà ha tschernì il num nubil da sia dunna Hanna.
L'ultima etappa ha manà da Tavau sur il Höhenweg cun il pli aut punct d'etappa da 2'321 meters sur mar, lura vai vinavant sur il Gotschnaboden Trail, sur la Via Alpina e sur l'Alp Clavadel e puspè enavos a Tavau. En tut èn quai 62 kilometers cun 2'450 meters ensi e 2'450 meters engiu.
Sin il tschintgavel plaz da la categoria maschadada èn Ursina Condrau e Sascha Deplazes (team Spar la bikeria) vegnids.
Avant la davosa etappa aveva il duo Spescha e Walter anc schanzas sin l'emprim plaz, els èn stads sin il segund plaz dal classament general. A la testa èn stads gia avant la cursa Gian Schmid e Lukas Flückiger. Plazza trais han occupà il duo talian Lorenzo Samparisi e Nicolas Samparisi, ch'han anc pudì far il sigl sin la segunda plazza.
Resultats e rangaziun
Er «Team RTR» a la partenza
Er in defect, ina platta bun 8 kilometers avant la fin, n'ha betg pli pudì franar il «Team RTR». Andreas Wieland e Cornelia Schwarzentruber termineschan il Swiss Epic 2024 sco 12avels en la categoria «Mixed». Tut en tut è il «Team RTR» stà sin viadi 26:39.21 uras durant las 5 etappas dal Swiss Epic ch'ha manà da La Punt en l'Engiadina a Tavau cun in stop a Cuira.
