La fin hai tanschì per ina plazza en la top 5. Sin il tschintgavel plaz da la categoria maschadada èn Ursina Condrau e Sascha Deplazes vegnids. «L'emprima etappa è stada dal sentir anora la meglra. Ed il davos di avain nus anc ina giada pudì mussar», ha ditg Ursina Condrau en l'arrivada da la davosa etappa dal Swiss Epic 2024.
Che Condrau e Deplazes vegnissan gist sin il tschintgavel plaz en la cursa, n'avessan els mai patratgà. Il «regl da morder ed ir atras» haja mintgina e mintgin, di Condrau, i saja dentant insatge auter da «metter quai sin palpiri», di Condrau levgiada e cuntenta en l'intervista.
«Il sport ha dà bleras ambiziuns er per la lavur»
D’engraziar sia vart sportiva ha Ursina Condrau a ses bab. Sco mattatscha ha ella cunzunt fatg passlung, er cursas. Dal sport ha ella emprendì da morder sin ils dents, da star vidlonder. E quai gida er en la vita professiunala sco tgirunza sin la staziun intensiva dal spital chantunal a Cuira.
Igl è pli simpel da cumbatter cunter auters che cunter sasez.
Ursina Condrau participescha cun ses partenari Sascha Deplazes al Swiss Epic. Quai è ina cursa da 5 dis, ella è 341 kilometers lunga ed i va 11’400 meters ensi e 12’500 meters engiu. Tut quai sin velo da muntogna tranter La Punt, Tavau e Cuira.
Per il chau èsi bun dad ir cun velo da muntogna en la natira.
Il Swiss Epic fa ella per il plaschair. Igl è il plaschair dad ir ora en la natira, da mudregiar il corp, da participar ad ina tala cursa. Quai dat bleras emoziuns e quai è in bel sentiment, di Ursina Condrau.
Jau hai mai pensà ch’ins chatta in carstgaun ch’è exact sco ins sez. Sascha è sco ina part da mi'olma, da mes corp. Quai giavisch jau a mintgin.
La gronda sfida è da na betg ir memia fitg il cumenzament da la cursa, da parter en l’energia. E lur er da baiver avunda e da mangiar per na betg dar en ina rusna. E lura er dad ir engiu, cunzunt sch’i avess da plover.
Tar problems da defects emprov jau da pinar mezza. Jau hai be in velo e quai sto funcziunar.
Igl è l’emprima giada che Ursina Condrau participescha ad ina tala cursa da 5 dis. Ella spera ch’ella dumogna fin la fin e che tut va bain, ch’i dat nagins accidents e naginas pannas pli grondas.
Jau hai fitg grond respect da questa cursa, jau hai anc mai fatg uschè insatge.