Las cursas da mountainbike dal Swiss epic pon er ils proxims trais onns vegnir organisadas en Svizra. Ils lieus partenaris per ils onns 2024 fin 2026 èn Tavau, Claustra e La Punt e las cursas consistan da mintgamai tschintg etappas dal di che han ina lunghezza totala da passa 300 kilometers. Quai communitgescha la Destinaziun turistica Tavau Claustra. Il Swiss epic è part da la «Epic Series» internaziunala cun cursas d'etappas en l'Europa, Africa ed Australia.
Plivalur turistica per il Grischun
Il «Spar Swiss Epic» genereschia mintg'onn var 10'000 pernottaziuns en il chantun Grischun. Ensemen cun ils 300 teams da dus viagian er confamigliars, gidantras e gidanters sco er collavuraturas e collavuraturs da las medias da lieu a lieu. Tenor la destinaziun Tavau Claustra èn las cursas pia ina plivalur per il turissem dal chantun Grischun.
