Il 2024 – in onn d’emblidar per Vital Albin. Il mountainbiker da Tersnaus è vegnì franà pervia da blers problems da sanadad. El ha gì da sbatter cun corona, cun micoplasma, cun ina stremblida dal tscharvè e cunzunt era cun sintoms da surtrenament. Uschia è il Lumnezian da 26 onns stà classà be ina suletta giada sut ils top 30 en ina cursa da la cuppa mundiala.
Jau trenesch uss pli pauc, persuenter han ils trenaments ina meglra qualitad.
Nova stagiun – nov’entschatta, quai è la devisa da Vital Albin che vul puspè returnar tar ils megliers mountainbikers dal mund. En vista al 2025 ha el tranter auter era midà trenader. Dapi la stad passada survegn el sustegn da l’anteriur profi ciclist ollandais Dennis van Winden che viva dentant en Spagna. Malgrà ina stagiun disgraziada dastga Vital Albin plinavant era quintar cun il sustegn da ses team da Thömus maxon cun il schef d’equipa Ralph Näf. Ses contract da profi tar Thömus è però vegnì prolungà be per in onn.
Homepage dal mountainbiker Vital Albin
La meglra medischina per far emblidar la stagiun passada fissan buns resultats gia a las emprims cursas da la cuppa mundiala ch’èn l’entschatta avrigl ad Araxá en la Brasilia. La gronda finamira quest onn èn lura cunzunt ils campiunadis mundials da chasa il settember a Crans-Montana e be in’emna pli tard las cursas da la cuppa mundiala a Lai. E nudà en l’agenda ha Vital Albin tranter auter era las cursas dals campiunadis svizzers l’entschatta fanadur a Savognin. La stad finescha il mountainbiker da Tersnaus lura er anc ses studi da dretg.
