La medema finamira vala era per ils campiunadis mundials. Ils davos dus onns è Vital Albin vegnì 15avel respectiv 14avel. Quest onn a Vallnord en l’Andorra vul el finalmain far il pass sut ils top 10. E las premissas èn bunas. A Vallnord sin in’autezza da bunamain 2’000 meters sur mar sa senta il Lumnezian numnadamain bain. Là ha el era cuntanschì fin oz ses meglier resultat da la carriera en ina cursa da cross-country da la cuppa mundiala. Il 2022 er’el vegnì 6avel. Ed era l’onn passà ha Vital Albin persvadì cun il 10avel plaz.
Quasi nagin tema èn perencunter ils gieus olimpics. Damai che la Svizra po trametter be dus atlets a Paris n’ha Vital Albin betg las meglras cartas. Cun Nino Schurter, Mathias Flückiger, Filippo Colombo u era Lars Forster è la concurrenza interna simplamain immensa.
Jau stoss simplamain esser realistic. Per avair ina schanza da pudair ir als gieus olimpics stuess jau mussar plirs exploits ed almain gudagnar ina cursa da la cuppa mundiala.
Vital Albin che lantscha sia quarta stagiun cun l’elita ha ils davos onns adina pudì far in pass enavant. Per in plaz sin il podest na manca betg bler. El stoppia simplamain anc vegnir in zic meglier, e quai dapertut, tant cundiziunalmain sco era tecnicamain, tacticamain e mental, uschia il mountainbiker da Tersnaus.
Vital sto crair vi da sasez, avair dapli curaschi, ir ora cun ils cumbels, e sche tut constat, lura ves jau el davanttiers, pertge el ha in nundetg potenzial.
Prioritad han per Vital Albin en mintga cas las cursas da la cuppa mundiala ed ils campiunadis mundials la fin avust. Far furora vul el dentant er a las cursas en Svizra, per l’ina a las cursas dal Swiss Bike Cup, quella seria ch’el ha gudagnà il 2023. Plinavant sa legra Vital Albin era sin las cursas da la Bike Revolution tar el a chasa a Cuira l’entschatta matg e bun pussibel saja era ch’el sa participeschia puspè ina giada al Bikemaraton Lumnezia ils 4 d’avust.
RTR metta il bike en il focus. Cun livestreams, resultats e reportaschas, cun atletas ed era cun vus.