Vital Albin è sa decidì pir a curta vista dad ir a la partenza en il Surses. La finala ha el sco grond favurit laschà nagina schanza a la concurrenza. Il Lumnezian ha gudagnà cun in avantatg da tschintg secundas sin Juri Zanotti. Cumplettà il podest sco terz ha Fabio Spena cun in retard da bun ina mesa minuta. Sin ils plazs 4 e 5 suondan ils dus Grischuns Janis Baumann dad Igis ed Ursin Spescha da Sevgein ch'èn stads ditg en la gruppa da testa.
Che Vital Albin è insumma ì a la partenza è stà ina surpraisa. Il mountainbiker da 25 onns è il mument vid far examens en ses studi da giurisprudenza. Perquai n'è Albin er betg sa participà al campiunadi d'Europa en la Pologna sco per exempel ses collega d'equipa Lars Forster ch'è vegnì segund a quest campiunadi d'Europa. Er betg a la partenza a Savognin èn stads Nino Schurter e Mathias Flückiger che sa concentreschan cumplettamain sin las cursas da la cuppa mundiala.
Tar las dunnas ha Rebekka Estermann da Sursee gudagnà a Savognin, quai avant Jacqueline Schneebeli e Christel Hubacher.
Vital Albin sin buna via da defender il titel dal Swiss Bike Cup
Vital Albin sa chatta suenter 5 da 7 cursas dal Swiss Bike Cup a la testa dal classement general. Gia la stagiun passada aveva el gudagnà questa seria da cursas.
La proxima cursa dal Swiss Bike Cup è ils 20 d'avust a Basilea e la davosa cursa è ils 24 da settember a Gstaad.
