L’emprima schanza survegn il Lumnezian en la cursa da short-track. En questa cursa è Vital Albin in da be dus svizzers che van a la partenza. Sper Albin è quai anc Thomas Litscher. Els dus partan er gist la chombra en il hotel da l’equipa svizra a Glentress Forest en il sid dad Edinburgh, betg lunsch davent da l’areal da cursas. Che Vital Albin dastga er siemiar d’ina medaglia, quai han ins vis en la cuppa mundiala. Avant bun in onn a Leogang er’el numnadamain vegnì terz en questa disciplina.
Van der Poel, Pidcock, Sagan
La concurrenza en la cursa da short-track è gronda, er sch’ils trumfs svizzers cun Nino Schurter, Mathias Flückiger u Lars Forster na van betg a la partenza per uschia sa focusar cumplettamain sin la cursa roiala da cross-country da la sonda. Per ina medaglia cumbattan perencunter Mathieu van der Poel, l’Ollandais ch’è vegnì a Glasgow campiun mundial en la cursa da via, lura l’actual campiun olimpic da mountainbike, il Brit Tom Pidcock sco er il star da velo slovac Peter Sagan.
La cursa da short-track dals umens d’elita cumenza la gievgia a las 17:45 uras. Silsuenter vegnan las dunnas d’elita en acziun. Là cumbattan tranter auter er Alessandra Keller, Jolanda Neff e Sina Frei per ina medaglia svizra.