38 kilometers per munts e vals - Vital Albin e Ginia Caluori gudognan il Bike Maraton Lumnezia

Vital Albin gudogna per l'emprima giada en sia carriera il Bike Maraton Lumnezia. L'indigen da Tersnaus ha gudagnà solo suenter ch'el ha pudì distanziar sin ils ultims kilometers Ursin Spescha da Sevgein che vegn segund. Plazza trais va a Daniel Widmer.

Sin ils emprims kilometers è Ursin Spescha stà a la testa. Vital Albin n'ha dentant betg laschà luc, ha pudì s'avanzar e sin ils ultims kilometers ha el lura pudì distanziar ses collega sursilvan.

Strusch duas uras han ils topatlets duvrà per absolver la cursa da 38 kilometers e cun 1'590 meters d'autezza. La cursa ha manà da Lumbrein sin l'alp Staviala Vedra, lura fin a Morissen ed enavos.

Tar las dunnas gudogna Ginia Caluori da Panaduz solo avant la campiunessa olimpica da Tokio, Jolanda Neff ch'è sa decidida a curta vista da far part a la cursa cun partenza ed arrivada a Lumbrein. Terza è Vera Schmid vegnida. La matadura locala Chiara Solèr che tutgava era tar las candidatas per ina plazza da podest ha stuì dar si la cursa suenter in defect.

Sper la cursa principala hai er anc dà pliras cursas d'uffants. La popularitad dal Bike Maraton Lumnezia sa mussa spezialmain era tar las cursas d'uffants. Tenor ils organisaturs haja dà radund 250 annunzias per il Bike Maraton 2024 e var la mesadad èn stà affons da las annadas 2010 fin 2018.

Impressiuns

33. Bike Maraton Lumnezia en survista

Avrir la box Serrar la box

38 kilometers

1'590 meters d'autezza

radund 240 participantas e participants

25% dunnas e 75% umens

ca. 100 voluntarias e voluntaris

Summa totala da premis: 2'000 francs . Per la dunna pli sperta ed il um pli spert a Staviala Vedra datti in premi da muntogna: ina chaschola. Er datti autras schanzas sin premims materials.

Victoria sursilvana a la premiera da la cursa da muntogna

Manuel Isenmann da Castrisch gudogna la cursa da muntogna dal Bike Maraton Lumnezia. Il currider da Castrisch è stà il sulet ch'ha dumangà la cursa da 6,1 kilometers e 600 meters d'autezza sut 40 minutas (39 min e 38 sec). El ha gudagnà cun var 30 secundas avantatg la cursa da Lumbrein sin l'alp Staviala Vedra. Segund è vegnì Ivan Demont e terz Severin Joho.

Tar las dunnas è Sabrina Degonda stada la pli sperta. Ella ha duvrà 48:07 minutas ed ha gudagnà avant Lea Tauern e Nadja Schmed. En la categoria sut 17 onns è Dario Spadin stà il pli spert.

Las curridras e curriders han dastgà absolver la cursa da currer tar cundiziuns optimalas. Igl è stà cuvretg ed uschia na betg memia chaud. Sin ils ultims meters avant l'alp Staviala Vedra han ils 43 participants dentant anc stuì cumbatter encunter la tschajera. Quai n'ha dentant la fin finala betg disturbà.

Ils responsabels dal Bike Maraton èn sa mussads cuntents cun l'emprema ediziun da la cursa da muntogna. Avant duas emnas avevien els mo 12 annunzias per la cursa e la fin finala èn 43 stads da la partida. Quai saja ina buna entschatta, tenor Norbert Capaul dal comite d'organisaziun. La finamira saja er da manar tras proxim onn questa cursa da muntogna.