Per la hotellaria a Tavau èn ils giasts che van sin la loipa ozendi ina cumponenta impurtanta, sco la presidenta da l’uniun «Hotel Gastro Tavau» Tamara Henderson ha ditg ad RTR. Dentant era fatschentas da sport profiteschan d’in uschenumnà effect da Cologna. Il sport haja dentant en general fatg in enorm svilup, declera Daniel Paschoud che maina gia dapi var 40 onns sia fatschenta da sport e ha vis las midadas dals davos onns.
Ozendi saja il passlung dasper il ski alpin ed il hockey ina da las fermas pitgas dal sport d’enviern a Tavau. Perquai saja la vischnanca er gugent pronta da far investiziuns per quest sport, sco il vicepresident communal Stefan Walser declera. Quai cun preparar las loipas – e surtut era cun il snowfarming che la vischnanca fa gia dapi plirs onns.
In giubileum mo mez gartegià ord vista svizra
Cun excepziun dals sprints d'equipa n'han ils Svizzers betg propi persvadì a lur cursas da chasa a Tavau, per els in dals emprims puncts culminants da la stagiun. Tant en las cursas da sprint sco er en las cursas da distanza n'han atletas ed atlets da Swiss Ski gì nagina schanza da cumbatter per in plaz da top 10 nundir per plazzas da podest.
E tuttina pon in u l'auter atlet esser cuntent cun lur prestaziun, oravant tut Roman Alder (20) da Puntraschigna ch'ha tar sia premiera en la cuppa mundiala gist cuntanschì ils finals dal sprint da la sonda saira. Er ina stupenta prestaziun ha Giuliana Werro mussà sco 27avla en la cursa da distanza sur ils 20 kilometers en il stil classic. Il punct culminant restan franc ils dus plazs da podest en ils sprints d'equipa dal venderdi saira nua ch'il duo cun Valerio Grond e Janik Riebli è vegnì segund ed il duo cun Nadine Fähndrich ed Anja Weber terz.
Betg il di dals Svizzers
Als passlunghists svizzers n’èsi betg ì sco giavischà en la cursa da distanza sur ils 20 kilomters en il stil classic sin lur loipa da chasa a Tavau. Puncts da la cuppa mundiala hai la finala dà be per Jonas Baumann. Il pli rutinà currider en il cader da Swiss Ski è vegnì 24avel, quai cun in retard da 2:34 minutas sin il victur norvegiais Martin Loewstroem Nyenget. Manchentà be per pauc ils top 30 ha Jason Rüesch da Tavau. Il mattadur local è vegnì 31avel. Il grond trumf svizzer, Beda Klee, ha stuì sa cuntentar be cun il 36avel plaz.
Resultat 20 km classic umens:
- Martin Loewstroem Nyenget (NOR) 55:37.8
- Iivo Niskanen (FIN) +13,1 sec.
- Hugo Lapalus (FRA) +35,1 sec.
Svizras perdan bler temp
Er las passlunghistas svizras n’han gì nagina schanza da cumbatter per in plaz sut las top 10. Meglra svizra è la finala Giuliana Werro stada. La curridra da Zernez è vegnida 27avla ed uschia anc stada classada dus plazs meglier che Nadine Fähndrich sco 29avla. La terza svizra a la partenza, Anja Weber, ha stuì sa cuntentar cun il 33avel plaz.
Johaug sin il podest, dentant betg sisum
Gudagnà la cursa n’ha betg la gronda favurita norvegiaisa Therese Johaug, mabain sia cumpatriota Astrid Oeyre Slind. La passlunghista norvegiaisa da 36 onns festivescha uschia a Tavau sia emprima victoria insumma en la cuppa mundiala. Giuliana Werro ha sco meglra svizra pers 5:25 minutas sin Slind.
Resultat 20 km classic dunnas:
- Astrid Oeyre Slind (NOR) 1:02:38.4
- Kerttu Niskanen (FIN) +10.1 sec.
- Therese Johaug (NOR) +13.5 sec.
Roman Alder procura per ina sensaziun
Il giuven currider da 20 onns da Puntraschigna ha tar sia premiera en la cuppa mundiala cuntanschì ils finals dal sprint en il stil liber a Tavau, quai sco 26avel da la qualificaziun. En il quartfinal è la cursa lura stada a fin per l'Engiadinais. Gudagnà il sprint ha Johannes Hösflot Klaebo.
Meglier n'avess Roman Alder betg pudì metter avant sia premiera en la cuppa mundiala. Emprima cursa cun ils gronds, ils stars, ils megliers dal mund, e gist ils emprims puncts da la cuppa mundiala. En il quartfinal ha l'Engiadinais da 20 onns schizunt astgà parter en il medem heat sco il grond dominatur e star da la scena, il Norvegiais Johannes Hösflot Klaebo ch'ha la finala er gudagnà il sprint ed uschia festivà sia 6avla victoria da la cuppa mundiala a Tavau.
Resultat sprint umens:
- Johannes Hösflot Klaebo (NOR)
- Lucas Chanavat (FRA)
- Erik Valnes (NOR)
Betg ì dal tut sco giavischà èsi als spezialists svizzers da sprint. Tant per l'indigen Valerio Grond da Tavau sco er perJanik Riebli, il duo ch'era vegnì il di avant segund en il sprint d'equipa, è la cursa da sprint medemamain stada a fin suenter il quartfinal. Betg meglier èsi er ì a las dunnas svizras. Tant Nadine Fähndrich, victura da la cursa da sprint a Tavau il 2022, sco er Anja Weber han stuì bandunar la loipa gia suenter il quartfinal.
Resultat sprint dunnas:
- Jonna Sundling (SWE)
- Mathilde Myhrvold (NOR)
- Julie Myhre (NOR)
Dasper Roman Alder ha er sia sora Fabienne (21) pudì dar a Tavau sia premiera en la cuppa mundiala. Sco 48avla ha ella però gì nagina schanza da cuntanscher ils finals cun las meglras 30. E tuttina po el turnar a chasa cun in satgados plain regurdientschas ed experientschas.
Svizzers lantschan fulminant lur cursas da chasa
Las cursas da l’ediziun da giubileum, 50 onns Tavau Nordic, han cumenzà grondius per passlunghistas e passlunghists svizzers. Tant tar las dunnas sco er tar ils umens hai dà in plaz da podest en il sprint d’equipa.
Tar ils umens è il duo cun Janik Riebli ed il mattadur local Valerio Grond currì sin il segund plaz. Pli sperts ch’ils Svizzers èn sulet ils Norvegiais stads. Per ils gronds favurits èn stads a la partenza Paal Golberg ed il dominatur Johannes Hösflot Kläbo. Per Kläbo èsi gia la 5avla victoria a Tavau, cunquai è el uss il victur da record. Cumplettà il podest sco terz ha il duo svedais cun Edvin Anger e Johan Häggström. Il segund team svizzer cun ils dus giuvens Antonin Savary e l’Engiadinais Noe Näff ha er persvadì cun il 9avel plaz.
Tar las dunnas èn Anja Weber e Nadine Fähndrich vegnidas terzas davos las favuritas, las Svedaisas cun Jonna Sundling ed Emma Ribom ed las Norvegiaisas cun il duo Kristin Fosnäs ed Astrid Slind. Il podest svizzer è cunzunt d’engraziar a Fähndrich che veva gudagnà il 2022 la cursa da sprint a Tavau. Tar la davosa midada ha Weber surdà a Fähndrich sco 8avla. La Lucernaisa ha silsuenter surpassà ina atleta suenter l’autra avant in publicum frenetic a l’ur da la loipa. La finala hai tanschì piz a cup per il terz plaz. Per Nadine Fähndrich gia il 15avel plaz da podest en sia carriera, per Anja Weber èsi ina premiera.
Trais dis spectacul da passlung a Tavau
Las cursas da la cuppa mundiala da passlung a Tavau festiveschan quest onn il giubileum da 50 onns. Durant trais dis da cursa cumbattan radund 165 atlets e 120 atletas da bun 40 pajais per puncts e plazzas da podest. Ils finals da las cursas da sprint vegnan mintgamai manads atras la saira cun glisch da chazzola, quai che procura per in’atmosfera tut speziala.
Program da cursa
| venderdi, 13 da december | 16:00 uras | prolog spint d'equipa umens e dunnas |
| venderdi, 13 da december | 18:00 uras | finals sprint d'equipa umens e dunnas |
| sonda, 14 da december | 14:45 uras | prolog sprint umens e dunnas |
| sonda, 14 da december | 17:15 uras | finals sprint umens e dunnas |
| dumengia, 15 da december | 11:30 uras | 20 km dals umens cun partenza idividuala (classic) |
| dumengia, 15 da december | 14:00 uras | 20 km da las dunnas cun partenza individuala (classic) |
Toni Livers – il sulet victur svizzer a Tavau
Il chapitel svizzer ord vista sportiva ha Toni Livers scrit durant quels 50 onns Tavau Nordic. Il currider oriund da Trun che viva dentant dapi il cumenzament da sia carriera a Tavau ha gudagnà il 2007 la cursa da 15 kilometers en il stil liber, quai ensemen cun il Franzos Vincent Vittoz ch’ha gì exact il medem temp sco Livers. Per l’anteriur profi è quai stà la suletta victoria en ina cursa singula da la cuppa mundiala. Ed el è fin oz il sulet currider svizzer ch’ha ina gia pudì triumfar a Tavau avant ils fans da chasa. Er ils ulteriurs Svizzers avevan persvadì en questa cursa; Remo Fischer era vegnì 5avel e Curdin Perl 10avel. Stà pliras giadas sin il podest a Tavau è Dario Cologna, però mai il pli sisum.
Dario Cologna kids-event & youth race
Gia per la terza giada vegn manà atras a l’ur da las cursas da la cuppa mundiala a Tavau il Dario Cologna kids-event ed il youth race. Durant ch’ils pli giuvens pon ina gia trenar e currer ina runda en il stadion Bünda cun lur idol e star Dario Cologna pon ils giuvenils fin a 16 onns far lur emprimas experientschas da cursa sut la batgetta dal quatter-dubel campiun olimpic.
Per questa ediziun da giubileum datti er in program da divertiment ed ina festa da giubileum. Plinavant spetga il venderdi saira in concert da Chue Lee e la sonda in concert da la band grischuna 77 Bombay Street.