Il passlunghist Jonas Baumann, oriund da Lon en Val Schons, lantscha cun 34 onns sia 16avla stagiun en la cuppa mundiala.
Suenter ils davos dus onns nua ch’jau hai gì fadia cun mia sanadad hai jau ditg a mamez, uschia na vi jau betg terminar mia carriera, uschiglio guardas adina enavos cun in’egliada fitg negativa.
El haja gust, saja fit e pront per in’ulteriura stagiun, di Jonas Baumann, cun 34 onns il pli vegl atlet en il cader da Swiss Ski. Ses debut en la cuppa mundiala aveva Baumann, che viva gia dapi onns cun sia famiglia a Tavau, dà la fin dal 2009. Suenter l’èra Dario Cologna ed era suenter la fin da la carriera da Roman Furger è Jonas Baumann daventà in dals leaders en il cader svizzer, in che gida a trair il char ed in che po cunzunt sa gidar e dar tips als giuvens grazia a sia gronda experientscha, ses grond trumf.
Jonas Baumann guarda cun optimissem vers la nova stagiun. El haja pudì trenar fitg bain e saja en furma. Quai ha el cunzunt er mussà al Nordic Weekend ad Andermatt la fin avust nua ch’el ha declassà l’entira concurrenza da Swiss Ski durant trais dis da cursa sin skis da rodas e da currer. Ed er a la cursa da currer Transviamala ha el mussà be il dies als concurrents. Resultats che motiveschan sa chapescha da cuntinuar.
Sch’il fieu na brischass betg pli per il sport lura na fiss jau betg pli qua
Plans a lunga vista na fa Jonas Baumann però daditg betg pli. El guarda da stagiun a stagiun. Er ils proxims gieus olimpics che spetgan gia il 2026 en il nord da l’Italia, pia quasi avant chasa, na cudizzan betg da gia prender uss ina decisiun co vinavant. El haja fatg sias experientschas cun gieus olimpics, betg mo positivas, da gliez anora pudessi el dir senza schletta conscienza ch’i saja bun uschia, er senza esser ina quarta giada a gieus olimpics, uschia l'atlet rumantsch.
La finamira per la stagiun 2024/2025 è da cumbatter regularmain per in plaz sut ils top 10, quai cunzunt tar las cursas da chasa a Tavau mez december ed en l’Engiadina la fin schaner, sco er al Tour de Ski ed al campiunadi mundial da ski nordic la fin favrer, entschatta mars a Trondheim en la Norvegia.
«Oz vai bain cun mai»
La motivaziun è gronda, il squitsch da turnar a chasa cun buns resultats però betg pli sco al cumenzament da la carriera. Avant prest otg onns ha Jonas Baumann fatg atras sia pli gronda crisa da la carriera. El era lura anc student a Cuira, trenava fin quatter uras a di, aveva adina dapli stress e squitsch. Mo Baumann na sentiva naginas emoziuns, er betg suenter avair manchentà be piz a cup ina medaglia cun la staffetta al campiunadi mundial a Lahti. El è crudà en ina rusna, adina pli profunda. Lura la diagnosa – depressiun da stancladad, cun auters pleds in burnout. Durant in mez onn è Baumann stà en tractament. Ils davos onns ha el cunzunt emprendì da tadlar l’emprim sin ses corp e sin sia olma, e pir lura sin ses plan da trenament. Oz ha el puspè chattà ses equiliber. En sia vita n’ha dentant betg pli il sport prioritad, er sch'el vul adina dar tut e cuntanscher il maximum. En il center stat sia famiglia. Jonas Baumann è maridà e bab da duas figlias.
Or da l'archiv