Dario Cologna ha absolvì en sia carriera 30 cursas da la cuppa mundiala a Tavau, quasi avant ses isch-chasa. Per ina victoria n’hai mai tanschì, dentant el è stà tschintg giadas sin il podest. La fin da la stagiun vegn il quatter-dubel campiun olimpic a terminar sia carriera.
Dals Svizzers ha sulet Candide Pralong pudì esser cuntent cun la cursa da 15 kilometers. Il Vallesan ha terminà la cursa sco 16avel cun in retard da 1:27.2 minutas ed è uschia stà il meglier currider da Swiss Ski. Grazia a quest resultat ha Pralong er dumagnà la qualificaziun per ils gieus olimpics d’enviern il favrer a Peking. Manchentà be per pauc in plaz sut ils top 30 ha Jonas Baumann. Il currider oriund da Lon en la Val Schons ha pers bler temp sin la davosa da trais rundas e la finala stuì sa cuntentar cun ils 33avel plaz cun in retard da passa duas minutas.
Premiera per Cla-Ursin Nufer
Cla-Ursin Nufer ch’ha 20 onns ha astgà dar a Tavau ses debüt en la cuppa mundiala. Il giuven passlungist Tujetschin ha pers strusch quatter minutas sin il victur e terminà la cursa sco 80avel.
Per Nufer n’èsi dentant betg ir en emprima lingia per puncts, mabain per rimnar experientscha en sia emprima cursa cun l’elita mundiala. I saja stà coolira, uschia Cla-Ursin Nufer en l’arrivada.
Proxima festa norvegiaisa a Tavau
Gudagnà la cursa da 15 kilometers en il stil liber ha Simen Hegstad Krüger, quai a moda suverana. Il Norvegiais ha battì ses cumpatriot Johannes Hösflot Kläbo per bun 23 secundas. Cumplettà il podest sco terz ha il Russ Sergey Ustiugov. Sin plazza quatter fin sis suondan trais ulteriurs norvegiais cun Harald Oestberg Amundsen, Hans Christer Holund e Sjur Roethe. Il Russ Alexander Bolshunov ha pers passa ina minuta ed è vegnì be 12avel.
Therese Johaug puspè sisum il podest
En la cursa da las dunnas sur 10 kilometers en il stil liber n’han la passlungistas svizras trumpà. Sco 30avla hai sulet dà puncts da la cuppa mundiala per Nadine Fähndrich, la Lucernaisa ch’era vegnida secunda en il sprint. Schizunt stuì dar si la cursa ha Laurien van der Graaff. Sco tar Dario Cologna èsi er stà per ella la davosa cursa da la carriera a Tavau.
Gudagnà ha Therese Johaug. La Norvegiaisa ha battì l’Americana Jessie Diggins per 14,5 secundas. Cumplettà il podest sco terza ha la Svedaisa Frida Karlsson. Ella ha pers 17,1 secunda sin la dominatura dals davos onns.