La cumpart da giuvens e giuvnas vulnerablas saja creschida. E quels hajan in pli grond ristg da sa servir da meds che fan dependents sco products da nicotin, u da fugir en las medias socialas. Quai constateschan ils experts e las expertas dal rapport «Panorama da dependenzas Svizra 2024».
Tenor las datas da studis publitgads l'onn 2023 resta il consum da substanzas aut tar ils giuvenils, u sa rinforzescha perfin anc en singuls secturs. Uschia n'è il consum da cigarettas betg sa reducì – entant ch'ina nova gruppa da giuvenils è sa furmada che consumescha e-cigarettas e snus. E da quai èn giuvnas pertutgadas pli ferm che giuvens. Gronds quitads fai tenor il rapport, ch'ils da 13 onns consumeschan dapli cigarettas u alcohol.
Las datas davart las activitads online da giuvenils mussan, che 4% dals giuvens en la vegliadetgna da 15 onns han in diever problematic da las raits socialas. E tar las giuvnas da la medema vegliadetgna è quest fenomen perfin da constatar tar 10% – quai munta ina dublegiaziun cumpareglià cun il 2018.
Ina survista da l'entira populaziun
Il rapport «Panorama da dependenzas Svizra 2024» furnescha era infurmaziuns cumpactas davart las diversas dependenzas en Svizra, e lur dimensiuns. Quai per l'entira populaziun, pia betg mo ils giuvenils. Qua suonda ina survista cun il stan actual.
Alcohol
Dapi il 1992 è la cumpart da persunas che baivan mintga di alcohol sa reducida per radund la mesadad. Il 2022 han anc 4% dals umens sur 15 onns e 3% da las dunnas gì in consum d'alcohol cronic problematic.
Dentant datti dapli persunas che baivan bler tar singulas chaschuns. 11% da las dunnas e 19% dals umens èn almain ina giada per mais sturns.
Tubac e products da nicotin
Bain è il consum da cigarettas sa reducì tar persuna creschidas – il medem mument hai dentant dà in augment tar il consum d'auters products da nicotin. Tenor la retschertga svizra da sanadad, ch'è vegnida fatga per telefon, fiman 24% da la populaziun svizra, 16% fiman mintga di.
Tar ils giuvenils n'è il consum da cigarettas betg sa reducì – persuenter èn vegnids vitiers persunas che fiman e-cigarettas u fan il vapen. In studi represchentativ da l'onn 2022 ha mussà che radund in terz dals giuvenils da 15 onns han fimà – u prendì snus – almain ina giada en ils davos 30 dis.
Cannabis ed autras drogas illegalas
Il consum da cannabis è restà sin il medem livel sco avant tschintg onns. 7,6% da la populaziun creschida ha inditgà d'avair consumà mariuana en il davos onn. Sa reducì è quai dumber tar ils giuvenils. Avant tschintg onns han anc 27% dals giuvens inditgà d'avair consumà mariuana, il 2022 èn quai be pli stà 20%.
Quitads fa tenor «Sucht Schweiz» il consum da cocain, oravant tut dals derivats che vegnan fimadas – crack e freebase. L'analisa da las auas persas en citads svizras mussa, ch'i dat là in dals pli auts consums per persuna da l'Europa.
Ils motivs per il grond consum sajan grev d'eruir, dentant hajan ils pretsch favuraivels sco era la disponibilitad dal cocain ina influenza.
Medicaments psicoactivs
Derasà tranter ils giuvenils è il consum maschadà da medicaments, ed il maldiever da medicaments. 12% dals giuvenils han gia fatg talas experientschas.
La vendita da meds da durmir e da calmants che pon far dependents è sin in aut nivel stabil. Ina leva digren constateschan ins tar la vendita da ferms meds cunter la dolur che cuntegnan opioids.
Gieus da cletg e per daners
Gieus da cletg èn tenor «Sucht Schweiz» oravant tut in problem tar umens e tar persunas giuvnas. En media han persunas che tschertgan agid tar ils posts da cussegliaziun daivets da radund 88'000 francs. Radund in mez milliun persunas en la Svizra han en il decurs da lur vita gì problems cun gieus da cletg u per daners.
Oravant tut ils gieus online èn populars. Uschia è la cumpart da persunas cun in cumportament problematic tar gieus online creschì entaifer da trais onns per il dubel. Il 2018 ha il studi «eGames» anc inditgà 2,3% giugadurs cun problems, il 2021 ha la segunda ediziun dal studi mussà 5,2%.
Activitads online
La retschertga svizra da sanadad ha mussà il 2022 che radund 7% da la populaziun dovra l'internet (u purschidas online) a moda problematica – independent da la schlattaina. Pertutgadas èn dentant oravant tut persunas tranter 15 e 24 onns – quels che dovran era l'internet il pli savens. Per experts èsi dentant cler che betg l'internet sez chaschuna problems, mabain sch'i vegn duvrà tscherts servetschs online da memia.
Radund in sisavel dals giuvenils da 15 onns dat mintga di gieus online. Per 3% èsi in problem da dar sapientiv pli pauc, els dattan per reducir schletta luna u din manzegnas pervi dals gieus. Ina anc pli gronda influenza han las raits socialas. Uschia inditgeschan ils studis che radund 7% dals giuvenils da 15 onns dovran questas raits a moda problematica. Oravant tut giuvnas scappan da sentiments negativs en il mund virtual.
In consum problematic è sch'ins passentass atgnamain pli gugent pli pauc temp en las raits socialas u sch'ins di manzegnas pervi dal consum.