Far in viva tutga en nossa societad tar blers eveniments simplamain vitiers. Tgi che na baiva nagin alcohol senta, ch'ins sto sa declerar bler dapli sch'ins prenda nagin cüpli u vin alv per far viva.
La dependenza è latenta
Cura ch'ina dependenza è avant maun sa possia dir fitg precis, di Simon Binz, psicolog ad expert da dependenzas tar il servetsch psicologic grischun. Alcoholissem na vegn dentant betg definì tras la quantitad dal consum, mabain tras las consequenzas ch'il consum d'alcohol ha per la persuna. Quai cun ils criteris dad ICD-10 da l'organisaziun mundiala da la sanadad (WHO). Sche trais da ses criteris èn avant man, lura as discurra d'ina dependenza. Per exempel sch'i dat sintoms da mancanza, in augment da toleranza u consequenzas nuschaivlas per il corp. Il process fin tar ina dependenza è latent, uschia che la gronda part da las persunas sajan surstadas, sch'ellas sentian tut en ina giada ch'i na giaja betg pli senza.
Substanza toxica
Alcohol, è in med stimulant che schlucca. Per il corp è il consum d'alcohol en sasez absolutamain toxic – l'alcohol attatga il corp en ils pli differents lieus. Procura per ina reducziun da cellas da gnerva en l'entir corp. Uschia ch'il consum d'alcohol po chaschunar per ina reducziun da las funcziuns dal tscharvè. Per surmuntar ina dependenza d'alcohol pon ins far ina terapia ambulanta u staziunara, la varianta staziunara è tenor Simon Binz dentant pli empermettenta che la varianta ambulanta.
L'omniperschientscha da l'alcohol en bleras situaziuns socialas po esser ina gronda sfida per ina persuna che vul surmuntar ina dependenza d'alcohol.
Surmuntar ina dependenza po esser ina gronda sfida, uschia è la quota da relaps suenter ina terapia tar cira 60%.
Agid tar la Crusch Blaua
La Crusch Blaua a Cuira porscha sustegn e cussegliaziun per persunas dependentas ed er per confamigliars. Il cussegliader Patrick Lippuner di, che sia clientella tutgia tar la classa sociala mesauna, saja activa en il mund da la lavur ed haja ina vegliadetgna da 35 onns e dapli. Per part giaja fitg ditg fin ch'ins ristgia dad ir per agid, quai perquai che la vargugna saja savens fitg gronda. La Crusch Blaua Cuira porscha cussegliaziun singula, mabain er en gruppa. Mintga mardi saira sa inscuntran alternant ina giada ina gruppa cun pertutgads ed ina giada ina gruppa da confamigliars. Il pli impurtant saja per las persunas en la gruppa la chapientscha e l'encunoschientscha da betg esser sulet.
Tuts san da tge ch'i sa tracta – ins na sto betg declarar bler, tuts discurran il «medem lungatg».
