Tubac, nicotin ed alcohol - Scolars e scolaras consumeschan memia bleras drogas
In nov studi mussa il consum d'alcohol, tubac e cannabis da scolars e scolaras svizras. Quel saja anc adina sin nivel bler memia aut, uschia «Sucht Schweiz».
Radund in terz da tut quels e quellas ch'han 15 onns, han consumà in product da tubac u nicotin durant ils davos 30 dis avant la retschertga. Quai scriva «Sucht Schweiz» en ina communicaziun. Oravant tut las e-cigarettas èn popularas, là hai era dà in augment dapi il davos studi il 2018. Il consum da normalas cigarettas, sco era d'alcohol è restà sin in sumegliant nivel sco avant la pandemia.
Maschadar alcohol cun medicaments
Per l'emprima giada han ins er rimnà datas tar il consum da medicaments en cumbinaziun cun alcohol. 4% dals scolars e scolaras da 15 onns han gia prendì almain ina giada in medicament per daventar sturn. 4% dals giuvens e 9% da las giuvnas han gia maschadà medicaments cun alcohol – quai vala sco fitg malsegir.
Il studi HBSC
Avrir la boxSerrar la box
HBSC stat per «Health Behaviour in School-aged-Children» (cumportament da sanadad tar uffants da scola). Il studi vegn fatgs en passa 50 pajais.
Al studi en Svizra èn sa participads 2022 636 classas, cun 9'345 scolaras e scolars da 11 fin 15 onns. Il studi vegn finanzià da l'Uffizi federal da sanadad e dals blers chantuns.
Fatg il studi ha «Sucht Schweiz», ina fundaziun independenta cun la finamira da reducir problems en connex cun il consum da substanzas psicoactivas e d'evitar cumportaments cun potenzial d'ina dependenza.
Facit
Per «Sucht Schweiz» mussa il studi che la politica stoppia agir. La giuventetgna stoppia vegnir protegida meglier da meds che chaschunan dependenzas.
