L’alcohol è francà en la cultura svizra. Tenor la fundaziun «Dependenzas Svizra» consumeschan var 85% da las persunas sur 15 onns pli u main regularmain la substanza psicoactiva.
Consum d'alcohol en Svizra ed en il Grischun
L'onn 2017 han 10,9% da la populaziun svizra consumà almain ina giada per di alcohol. Questa cumpart è sa sminuida dapi il 1992. Da quest temp consumavan anc 20,4% da la populaziun almain ina giada a di alcohol. Quai mussan las cifras da l'Uffizi federal da statistica ch'èn vegnidas fatgas dapi il 1992 mintga tschintg onns fin il 2017. Tar la retschertga dal 2017 han ins dumandà passa 22'000 persunas en Svizra.
Grischun : 12,3% da la populaziun grischuna baiva mintga di alcohol – quai è in pau sur la media da 10,9%. E 18,1% dals Grischuns e las Grischunas na baivan insumma nagin alcohol – quai che correspunda exact a la media Svizra. 26,3% dals Grischuns baivan fin trais giadas per mais – quai ch'è sur la media Svizra da 23,1%. E 43,3% dal chantun baivan almain mintg'emna – la media Svizra è là tar 47,8%.
Nua ch'i dat er ina differenza tar il consum d'alcohol è tar la vegliadetgna. Tenor la retschertga dal 2017 consumeschan persunas pli veglias en Svizra tendenzialmain pli savens alcohol che persunas pli giuvnas.
Tar il consum excessiv d'alcohol èsi il cuntrari. Là datti dapli excess tar persunas pli giuvnas cun 23% da las persunas tranter 15 e 34 onns e 6,9% da las persunas cun 65+ onns.
Differenza tranter schlattainas
La retschertga mussa era che umens consumeschan pli savens alcohol che las dunnas. Dentant hajan ils umens tranter il 1992 ed il 2017 reducì pli fitg lur consum che las dunnas.
Era tar las persunas cun in consum d'alcohol problematic datti differenzas tranter las schlattainas.
| Schlattaina | Svizra | Grischun |
|---|---|---|
| Umens | 5,2% | 4,6% |
| Dunnas | 4,1% | 3,2% |
| Total | 4,6% | 3,9% |
Bavrondas alcoholicas ed il magiel da standard
-
Bild 1 von 6Legenda: In alcopop da 3dl cun 5% vol è in magiel da standard. Pixabay -
Bild 2 von 6Legenda: 5 dl gervosa cun 4,5% vol èn dus magiels da standard. Pixabay
-
Bild 3 von 6Legenda: 1,5 dl vin cun 13,5% vol è in magiel e mez. Pixabay
-
Bild 4 von 6Legenda: In mojito (0,6 dl) cun 40% vol èn dus magiels da standard. Pixabay
-
Bild 5 von 6Legenda: 1 dl Martini cun 15% vol è in magiel da standard Pixabay
-
Bild 6 von 6Legenda: In magiel da 0,4 dl whisky cun 40% vol correspunda ad in magiel da standard. Pixabay
Las pli novas cifras en connex cun il consum d'alcohol èn dal 2017. Dentant han per exempel retschertgas da Statista Research Department mussà ch'i è vegnì bavì en general damain alcohol il 2020, l'onn nua che la pandemia da corona ha cumenzà, che anc il 2019. Era l'Associaziun svizra dal commerzi da vin aveva durant il lockdown il 2020 constatà ina reducziun dal consum.
Persunas ch'eran dentant gia dependentas d'alcohol avant la pandemia da corona, hajan durant la pandemia bavì dapli. Quai ha mussà il rapport «Panorama svizzer da dependenzas 2021» da Dependenza Svizra.
Per amur da la sanadad duess ins resguardar il suandant:
In mussavia da la Cumissiun federala per dumondas d'alcohol.
| Persunas creschidas saunas |
Umens sauns na duessan betg baiver dapli che dus magiels per di. Per dunnas vegn recumandà da betg surpassar ina bavronda alcoholica a di. Plinavant duain ins passentar dis senz'alcohol durant l'emna. Sch'i vegnia bavì dapli en il decurs da pliras uras, lura vala per umens ina limita da tschintg magiels da standard e per dunnas ina limita da quatter magiels da standard. |
| Uffants, giuvenils e creschids giuvens |
Per uffants e giuvenils vala: nagin alcohol or da motivs da sanadad. Per creschids giuvens vala da baiver pauc u darar. Episodas da consum excessiv èn d'evitar. |
| Persunas pli veglias | Persunas attempadas reageschan pli sensibel sin alcohol. I vala la paina da reducir il consum cun la vegliadetgna. |
| Uschè pauc sco pussaivel alcohol |
- durant la gravidanza - sch'ins prenda medicaments - sin via en il traffic - durant lavurs che dovran concentraziun auta - durant far sport |