Alcoholichers ed alcoholicras èn persunas sco Vus e jau. Quai po esser Voss bab, Vossa onda, Voss vischin u Voss collega da lavur – ina dependenza d'alcohol po tutgar mintgin e mintgina. Discurrì da problems d'alcohol vegn dentant pauc – ins po survegnir l'impressiun che tuts baivan mo nagin ha in problem. Alcoholissem para d'esser in tabu.
La «Marella» lascha vegnir a pled in um ed ina dunna ch'eran dependents da l'alcohol ed in um d'ina alcoholicra. Las persunas purtretadas en questa «Marella» vulan restar anonimas. Per proteger lur dretgs da persuna, survegnan ellas nums fictivs. Las expressiuns d'ellas èn vegnidas legidas da redacturas e redacturs da RTR. Las istorgias èn dentant realas.
Viver ensemen cun in'alcoholicra
Sch'ins viva ensemen cun ina persuna dependenta da l'alcohol stoppian ins fitg spert emprender da vegnir a frida cun la nova situaziun. La dunna da Paul era cun ina giada sa midada – ditg n'ha el betg savì tge che la raschun per la midada era. «Mia dunna è daventada in'autra persuna – ina persuna che jau na maridass betg pli», di Paul.
Perquai ch'el n'ha betg pli tegnì or a chasa, ha el per part stuì fugir. Paul ha stuì emprender ch'el sto metter cunfins clers per el sez. Sche sia dunna ha bavì, na passenta el per exempel betg pli las sairas cun ella e sa retira en sia chombra. I saja impurtant da guardar per sasez, uschia ha Paul tschertgà agid professiunal e s'entaupa mintga duas emnas cun auters confamigliars d'alcoholichers u alcoholicras. E tuttina ha Paul per il mument decidì da restar tar sia duna a da sustegnair ella – e quai fa el gia bunamain 10 onns. Garanzia na po el dentant dar nagina. A la fin finala na possia el betg spendrar sia dunna, el possia sulettamain spendrar sasez.
Il cumbat encunter la dependenza
Barbla ha cumenzà a baiver regularmain alcohol, perquai ch'ella na pudeva betg durmir. Cun ina giada ha ella stuì constatar, ch'il na gieva betg pli senza. «Schebain che jau saveva che jau hai in problem e dovrel agid, hai jau duvrà in'eternitad da dumandar per agid – or da spira vargugna», di l'ex-alcoholicra.
Barbla ha fatg pliras emprovas da vegnir libra da l'alcohol. Fin l'ultim na dumagnava ella betg pli dad ir a lavurar, perquai che ses consum d'alcohol aveva prendì suramaun. Ella è arrivada al punct, nua ch'ella aveva tema da murir.
Il corp sa dosta en moda e maniera brachiala
Pervia da ses consum d'alcohol excessiv è Andri sa tschentà sin la staziun d'urgenza dal ospital cun in'inflammaziun dal Pancreas. L'emprima giada ha el passentà in'emna en l'ospital. Er Andri ha fatg pliras emprovas da chalar da baiver, dentant cun pauc success. En ils menders temps haja el bavì tochen duas buttiglias d'auta procentuala al di – fin che ses corp na pudeva betg pli: Andri è per la segunda giada sa tschentà en l'ospital cun ina pancreatitis – quella giada n'ha in'emna en l'ospital dentant betg bastà – sia schanza da surviver era tar 3%. Per il nair da l'ungla ha Andri pudì mitschar la mort.
Per el dettia sulettamain «dal tuttafatg» u «insumma betg», di Andri. Trais mais en l'ospital, in da quels sin la staziun intensiva, e suenter trais mais en ina clinica da reabilitaziun: il resultat dal consum d'alcohol d'Andri. Per el è quai LA schanza da puspè pudair turnar en la vita. Per el haja duvrà quella situaziun extrema.
Nus dain in cuc davos las culissas, explitgain e mettain en context, sajan quai fenomens novs, u istorgias pac enconuschentas.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.