Per che la Svizra haja l'enviern avunda energia lantscha la Confederaziun sia campagna da spargnar. Uschè bleras Svizras e Svizzers duain sa participar voluntarmain e procurar che la Svizra vegn d'evitar ina situaziun cun memia pauc energia, uschia la speranza dal Cussegl federal.
La campagna duai survegnir schlantsch cun il slogan «L'energia è stgarsa – nus na sfarlattain betg ella.» La campagna mussa a la populaziun ed a l'economia tips simpels per spargnar energia sco p. ex.:
- sminuir la temperatura en chasa
- cuschinar cun viertgel
- stizzar dal tuttafatg apparats ch'ins na dovra betg
- far la duscha empè d'in bogn e quai betg memia chaud (i vegn cusseglià 37°C)
A blers sajan ils tips probablamain enconuschents ma giajan savens en emblidanza en il mintgadi. La finamira saja perquai da puspè clamar en memoria questas pussaivladads da spargnar. Visualisà vegn tut cun maletgs da cameras da chalira che mussan nua ch'energia va savens a perder.
Tar ils tips e detagls davart la campagna
Ina «allianza per spargnar»
Elavurà la campagna ha la Confederaziun ensemen cun passa 40 partenaris da l'economia, dal maun public ed organisaziuns civilas. Els èn sa cunvegnids da sustegnair tranter auter suandantas stentas per spargnar energia en vista a l'enviern:
- Mintga ura kilowatt spargnada quinta, a partir d'immediat.
- Igl è decisiv tge che nus faschain uss la fin da la stad e durant l'atun.
- Mesiras ed optimaziuns en fatschentas a curta vista èn relevantas per garantir il provediment l'enviern.
- Finamira da spargnar 15% gas durant l'enviern cun mesiras voluntaras (finamira dal Cussegl federal e da l'UE)
Na portan ils tips che mintgina e mintgin po realisar a moda voluntara suondan en in'emprima fasa appels directs da spargnar fin tar contingents d'electricitad. Quai tenor la lescha per il provediment dal pajais.
Sper il fatg ch'il Cussegl federal quinta cun il sustegn da la populaziun per surmuntar eventualas stretgas en il provediment da gas ed electricitad ha el era instradà ulteriuras mesiras:
