Il chantun Grischun sa prepara per in'eventuala situaziun da mancanza d'electricitad e da gas. Per quest intent engascha el ina part dal stab directiv chantunal, il stab parzial «Segirezza dal provediment d'energia». Quel surpiglia la coordinaziun cun la Confederaziun, cun ils gremis naziunals, cun la branscha d'energia e cun las vischnancas. El è suttamess a l'Uffizi per militar e protecziun civila.
La responsabladad principala per dar dumogn ad ina eventuala situaziun da mancanza è tar la Confederaziun e là en spezial l'organisaziun OSTRAL, l'organisaziun per il provediment d'electricitad en situaziuns extraordinarias. Ella è suttamessa a l'Uffizi federal per il provediment economic dal pajais (BWL). Per part vegn era anc involvida la Cumissiun per electricitad (ElCom).
Per ina eventuala situaziun da mancanza da gas n'exista anc nagina organisaziun da crisa specifica. Quella vegn però stgaffida actualmain da la Federaziun da l'industria da gas svizra. Il stab chantunal ha l'incumbensa da coordinar e realisar las mesiras che vegnan da la Confederaziun sin nivel chantunal. Quai en collavuraziun cun ils partenaris da la branscha d'energia, las vischnancas ed ulteriurs partenarias.
Plattafurma d'infurmaziun analog a quella da Covid-19
Per communitgar svelt cun la populaziun ed economia vegn creada ina plattafurma analoga a quella da Covid. Là duain alura vegnidas repartidas las infurmaziuns relevantas. La plattafurma è actualmain en lavur, scriva il chantun en ina communicaziun.
Pli pauc gas russ e sitgira sco raschuns per la mancanza
Facturs che pudessan manar ad ina mancanza d'energia l'enviern èn:
- La Russia che furnescha pli pauc, l'Europa è però fermamain dependenta da quel.
- Ina buna part da las ovras atomaras en Frantscha na produceschan per il mument nagina electricitad (da questa electricitad importescha la Svizra savens durant l'enviern).
- Pervia da la sitgira èn ils lais da fermada pauc emplenids uschia ch'i vegn (sch'i dat vinavant pauca plievgia) er producì pli pauc electricitad cun las ovras idraulicas.
