Las Viafiers federalas per exempel pudessan anc mantegnair radund in'ura lur manaschi. Sumegliant tuna quai tar la Swisscom: Ella na pudess strusch sminuir ses consum d'energia parzialmain – sco per exempel per las antennas da telefonins. La Migros ha annunzià ch'ella serass singulas filialas sche l'electricitad vegniss stgarta. Uschia resumescha SRF ils discurs dal matg.
Pli probabel fissan mesiras da spargnar
La Confederaziun pudess ordinar a las interpresas da reducir lur consum d'electricitad. Dentant vesan las interpresas era là in grond problem: Spargnar munta pli pauc prestaziun. En tschertas spartas na saja quai gnanc pussaivel, sco per exempel tar la Posta per sortir la posta u tar la Swisscom che pretenda da stuair serrar giu tschertas regiuns en in tal cas. Tuts pretendan excepziuns - gliez saja dentant grev da realisar pervia da la tecnica, argumentescha la Confederaziun.
Tenor SRF elavura la Confederaziun il mument scenaris sch'i vess da dar ina stgarsezza d'electricitad. Pussaivel fiss per exempel da tschentar per singulas uras l'energia per privats. Il mument na regia però nagina situaziun d'urgenza.
Daco exista questa tema?
Tenor Werner Luginbühl, president da la cumissiun d'electricitad federala Elcom, saja ina cumbinaziun tranter differentas circumstanzas la raschun per la tema d'avair memia pauc electricitad. Per l'ina dettia ina malsegirtad pervia da la guerra en l'Ucraina e cunquai la furniziun da gas or da la Russia. Per l'autra sajan differentas ovras atomaras en Frantscha actualmain ord funcziun pervia da problems tecnics. En pli saja era la setgira en Svizra in motiv perquai ch'ils lais da serra han uschia pli pauc aua. Quai ha el ditg envers la «NZZ am Sonntag».
En il mender cas stuain nus quintar il proxim enviern cun interrupziuns d'electricitad, era sch'igl è be a l'ura.
Il schef da la Elcom fa dentant er renfatschas a la politica. Quella n'haja betg prendì serius avunda ils avertiments da sias autoritads.
L'emprim vegniss l'industria vidlonder
Sch'i vegn propi uschè lunsch che nus stuain raziunar, vul la cussegliera federala Simonetta Sommaruga l'emprim raziunar l'electricitad tar l'industria avant che las chasadas vegnissan vidlonder.