La rait electrica en Svizra mesira 250'000 kilometers – pia tanschessan tut questas lingias 6 giadas enturn il mund. La rait è colliada cun l’entira Europa. Damai, Sch'igl avess da vegnir ad ina mancanza d’electricitad, alura pertutgass quai er noss vischins. Tenor in studi che la Confederaziun ha publitgà saja ina mancanza d’electricitad pussibla suenter l’enviern da l’onn 2025. Per il mument sa chatta la Svizra en il stadi normal, vul dir dad observar la situaziun dal provediment. En cas d’indizis d’ina mancanza, reagescha il Cussegl federal e lavura tenor il concept da OSTRAL – l’organisaziun che proveda electricitad en situaziuns extraordinarias.
Il scenari da quatter pass en ina situaziun da mancanza d’electricitad:
- Appel a la populaziun da spargnar energia
- Introducir scumonds e restricziuns dal consum
- Contingentaziun per consuments gronds
- Interrumper la rait electrica
En in emprim pass fa la Confederaziun quint cun la solidaritad da la populaziun. I vegn dumandà responsabladad individuala e persunala.
En in segund pass vegnan introducids scumonds e restricziuns dal consum, per exempel na pon betg vegnir duvradas saunas, climatisaziuns e stgalas rudlantas.
Tge che n'è betg necessari per viver, vegn restrenschì sco emprim.
En in terz pass proclamescha il Cussegl federal contingents per consuments gronds. Consuments che dovran dapli che 100 uras megawat electricitad en in onn, han da limitar lur consum d’energia.
l'ultim e quart pass en il concept da OSTRAL è l’interrupziun da la rait electrica. Quel avess consequenzas considerablas per l’economia e la populaziun. L’interrupziun funcziuna da maniera ciclica, vul dir che per quatter uras è ina part dal territori senza electricitad, e per las proximas quatter uras in autra part. Tar infrastructuras criticas ch'èn relevantas per il sistem – sco ospitals, pumpiers, polizia e praschuns – vegn l’interrupziun impedida uschè ditg sco pussibel.
In scenari mussa ch'i pudess esser che nus avain intgins dis senza forza electrica l’onn 2025.
La pli gronda sfida vegn ad esser da collavurar cun 50 differents gestiunaris da la rait.
Situaziun en il Grischun
Il stab da crisa dal chantun Grischun è sa scuntrà per far in concept concret per in cas d’ina mancanza d’electricitad. Departaments e partenaris èn vegnids ensemen per elavurar ina soluziun communabla. Igl è planisà ulteriurs inscunters per la planisaziun da detagl.