En vista ad ina mancanza d’electricitad eventuala l’enviern che vegn vul il Cussegl federal che ovras electricas d’urgenza stettian a disposiziun. Quai ha el decis a sia sesida da mesemna. Ils departaments d’energia e d’economia duain negoziar cun furniturs eventuals d'ovras eletricas da reserva da gas ed ieli. En pli vulan els sclerir sch'igl è pussaivel d'utilisar 300 generaturs d'urgenza che stattan a disposiziun en Svizra.
Ovras da reserva da gas
Tenor la Confederaziun duain las ovras da gas gia esser prontas vers la fin da quest enviern per supplementar las reservas da la forza idraulica en cas da scartezza d'energia.
Tenor la Confederaziun sa tractia d'ina prestaziun da 300 megawatts, quai è var 80% da la forz'eletrica che l'ovra atomara da Mühleberg produciva cura ch'ella era anc vi da la rait.
La Cumissiun federala d'electricitad (ElCom) aveva recumandà l'onn passà da construir fin l'onn 2025 duas fin trais ulteriuras ovras da gas d'urgenza cun ina prestaziun totala da 1'000 megawatts. Il departament d’energia ha uss examinà sche questas ovras pudessan gia vegnir duvradas a l'entschatta dal 2023. Perquai ch'il provediment da gas n'è betg garantì èsi cundiziun che quests implants funcziuneschan er cun ieli, scriva la Confederaziun.
Generaturs d'urgenza
En pli sclerescha la Confederaziun sch'igl è pussaivel d'utilisar generaturs d'urgenza. Tenor la Confederaziun datti var 300 da quels en Svizra. Els furneschan ensemen circa 280 megawatts e vegnan actualmain duvrads dal gestiunari da la rait d’electricitad svizra Swissgrid per servetschs da sistem.
La dumonda da l'utilisaziun dals generaturs d'urgenza saja però cumplexa, scriva il Cussegl federal. I dovra tranter auter la lubientscha dals possessurs u ch'i sajan er da sclerir dumondas logisticas sco il provediment u pajament da carburant per ils agregats.
