Quant gas vegn duvrà en Grischun? Mintga di duvrain nus energia en furma d'electricitad, materials fossils dad arder e carburants. Per be 4% da l'entira dumonda d'energia en il Grischun vegni duvrà gas, di Thomas Schmid, il manader da l'Uffizi d'energia e traffic. Sco che questa grafica mussa èn auters chantuns, surtut aglomeraziuns da citads en la Svizra dal vest pli dependentas dal gas ch'il Grischun.
Per tge vegn il gas duvrà? En Svizra vegn il gas surtut duvrà per stgaudaments da chasas. Per producir electricitad na vegn il gas betg duvrà. Las regiuns dal Grischun che stgaudan per part cun gas èn la Val dal Rain da Cuira, ina part dal Plaun (Imboden) e dal Signuradi.
Intginas firmas dovrian anc gas per tscherts process, quai dentant lura savens a moda mobila cun implants da tancs. La tendenza generala saja plitost da vulair remplazzar stgaudaments fossils (ieli e gas).
Producescha la Svizra sezza gas? La Svizra producescha strusch agen gas. Quai è ina gronda differenza cumpareglià cun ils pajais vischinants. Quasi tut il gas ch'è relevant per la Svizra è pia gas natiral (Erdgas) che vegn importà. Il sistem funcziuna pia tras ina furniziun constanta, uschia Thomas Schmid da l'Uffizi chantunal d'energia e traffic.
Ha la Svizra avunda gas per l'enviern? La Svizra emprovia ussa da survegnir garanzias per il proxim enviern. Ella vul avair access a las furniziuns ed als magasins da gas, quai surtut da la Germania, da la Frantscha, da l'Ollanda e da l'Austria. Tenor Thomas Schmid saja quai però grev en ina situaziun da crisa. Uschia saja la situaziun pertutgant il gas detg malsegira. Tge che saja dentant in avantatg per la Svizra è ch'ella na producescha nagina electricitad da gas.
Co reagir en cas d'ina mancanza da gas? Tut ils pajais stoppian guardar per alternativas pertutgant gas. La Russia vegnia franc a tegnair l'Europa sut pressiun pertutgant il commerzi da gas, di Thomas Schmid. Era sch'il gas gioghia ina rolla pli pitschna en Svizra ch'en ils pajais vischinants stoppia ella sa preparar.
La Confederaziun e l'Uffizi per il provediment economic dal pajais executeschan las mesiras e l'industria da gas realisescha lura ellas. Nua ch'i saja pussaivel da remplazzar il gas saja l'ieli la suletta alternativa.
A lunga vista èsi impurtant da promover energias regenerablas. Il proxim enviern è però gia qua en quatter mais.
Avessan ins pudì evitar ina dependenza da gas da l'exteriur? D'impedir la situaziun actuala cumplettamain fiss stà grev. Tuttina sa mussia uss che l'Europa saja sa fatga dependenta da la Russia. Ils custs d'energia vegnian en mintga cas a s'augmentar. Tenor Thomas Schmid na vegnia quai però betg ad esser in problem finanzial per la gronda part dals consuments e da las consumentas.
Tge è impurtant per il futur tenor l'expert? Impurtant saja tenor Thomas Schmid che la societad midia en general sia conscienza pertutgant l'energia. Il consum d'electricitad creschia, nus dovrian pia dapli electricitad. En general stoppia la populaziun savair ch'i dettia ina probabladad d'ina mancanza da gas, ma ch'i dettia era in plan, co vegnir a frida cun quella.
