Novitads dals 23-11-2024 - Novas abitaziuns planisadas per indigens a Schluein

• La vischnanca da Schluein ponderescha da construir otg abitaziuns per indigens . Bajegiar vul ella quellas en il bajetg da l 'Ustria Posta Veglia ed en in bajetg annex che duai vegnir construì da nov. L'ustaria existenta saja previs da mantegnair vinavant, è vegnì communitgà il venderdi saira a la radunanza communala. Tenor ina calculaziun da custs muntan las investiziuns per il project a 5,4 milliuns francs . La radunanza ha decidì cun 49 encunter 31 vuschs da cuntinuar cun la planisaziun.

• Succes svizzer en il sport d’enviern:
  - Las curlistas svizras èn daventadas campiunessas europeicas – gist sco avant in onn. En la Finlanda han las Svizras cun la skip Silvana Tirinzoni gudagnà il final cunter las Svedaisas cun 8:4.
  - La skiunza svizra Camille Rast ha cuntanschì il terz plaz en il slalom a Gurgl el Austria. Per ella èsi l’emprim plaz da podest da la cuppa mundiala. Gudagnà ha l’americana Mikaela Shiffrin che festivescha aschia gia sia 99avla victoria d’ina cuppa mundiala.
  - In segund plaz hai dà per il freeskier Grischun Andri Ragettli en la concurrenza da slopestyle a Stubai en l'Austria. Tar las dunnas han las Svizras Mathilde Gremaud e Sarah Höfflin fatg plaz dus e trais .

• Sguard enavant:
  Dumengia votescha il souveran svizzer davart quatter fatschentas federalas . I va per la finanziaziun unitara da las prestaziuns da sanadad , per la cumplettaziun da las vias naziunalas e per duas fatschentas che pertutgan il dretg da locaziun – sutlocaziun ed agen basegn . Ed er sin nivel communal decidan las grischunas ed ils grischuns davart credits u novas persunas a la testa . Tranter auter vegnan elegids ils presidents communals per Tusaun e Samedan. Ed a Domat elegia il suveran ses parlament da vischnanca.

Il di en survista: