Per l'agen basegn valan oz premissas severas. Disdir in contract pon proprietarias e proprietaris be sche l'agen basegn è urgent. Igl è però difficil da cumprovar l'urgenza da l'agen basegn. Entras quai poi dar lungas proceduras legalas quai che retardescha da pudair nizzegiar las atgnas localitads. Il parlament vul perquai adattar la lescha, il Cussegl federal è a l'entschatta stà da l'avis ch'ina midada da lescha na saja betg necessaria. Cunter las adattaziuns da la lescha è vegnì prendì il referendum, perquai vegn il project avant il pievel.
Il project prevesa da valitar pli fitg l'agen basegn da proprietarias e proprietaris, il basegn stuess en l'avegnir esser impurtant ed actual e betg pli urgent.
Reglas pli luccas en trais cas
- Cumpra d'ina immobiglia: Sch'insatgi cumpra in'immobiglia e dovra sez las localitads dastga quel disdir il contract a locataris existents. Per abitaziuns vala qua in termin da disditga da trais mais e per localitads da fatschenta sis mais.
- Suenter ina dispita giuridica tranter proprietarias e locataris: Savens giaudan las locatarias u ils locataris suenter in tal cas ina protecziun cunter la disditga. Sche las proprietarias u ils proprietarias dovran sez las localitads pon ellas far valair l'agen basegn, malgrà la protecziun cunter la disditga.
- Disditga betg supportabla: Sche locatarias u locataris argumenteschan che la disditga sin il termin na saja betg supportabla sto in post da mediaziun (ed en segunda instanza ina dretgira) considerar ils giavischs dals locataris e dals proprietaris. Sch'il proprietari vul en quest cas da direzza utilisar sez sia immobiglia sto il post da mediaziun/dretgira resguardar l'agen basegn.
La nova regulaziun na mida nagut vi dal fatg che locatarias e locataris han in dretg d'indemnisaziun sch'ina disditga suenter ina midada dal possessur chaschuna in donn finanzial ad els.
Arguments per ed encunter las novas reglas da sutlocaziun
La nova regulaziun dal dretg da regulaziun duai far frunt a maldiever da sutlocaziun.
Il comité da referendum di ch'il project fetschia part d'ina gronda attatga sin la protecziun dals locataris.
Il Cussegl federal sco er il parlament recumondan d'approvar la midada pertutgant la disditga pervia d'agen basegn. Il Cussegl naziunal è s'exprimì cun 123 cunter 72 vuschs tar 1 abstenziun per la midada. Era il Cussegl dals chantuns ha ditg Gea, quai cun 33 cunter 11 vuschs. Abstenziuns n'hai dà naginas.
La Partida verdliberala dal Grischun ha prendì la parola Na, cuntrari a la partida naziunala. Lezza ha decis da sustegnair las midadas en connex cun la disditga pervia d'agen basegn.
