En l'avegnir ston las locatarias ed ils locataris che vulan dar en sutlocaziun stanzas, far la dumonda correspundenta en scrit a la locatura u al locatur. Ellas ston avair in consentiment en scrit. Locaturs dastgan da nov refusar ina sutlocaziun cunzunt sche quella duai durar pli ditg che dus onns. En cas d'abus po la locatura disdir il contract da locaziun cun in termin da 30 dis, sche in'admoniziun n'ha betg fatg effect. Cunter quest project hai dà in referendum, perquai dovri ina votaziun.
Diever e maldiever da la sutlocaziun
Cun dar en sutlocaziun l'abitaziun èsi pussaivel per locatarias da dar vinavant l'abitaziun durant in temp d'absenza e suenter puspè abitar sez en l'abitaziun. Plinavant pon ins uschia er parter il tschains cun dar en sutlocaziun singulas stanzas. Tar sutlocaziuns poi dentant er dar maldiever ed uschia dischavantatgs per locaturas e locaturs. Quai per exempel sche las stanzas u l'abitaziun vegnan dadas en sutlocaziun per pretschs pli auts u sche memia bleras persunas vivan en in perchasa.
Arguments per ed encunter las novas reglas da sutlocaziun
La nova regulaziun dal dretg da locaziun duai far frunt a maldiever da sutlocaziun.
Il comité da referendum è da l'avis che la midada restrenschia massivamain il model da sutlocaziun che saja sa cumprovà. Ella saja ina attatga sin la protecziun da locatarias e locataris.
Il Cussegl federal sco er il parlament recumondan d'approvar la midada dal Dretg da locaziun quai che pertutga la sutlocaziun. Il Cussegl naziunal è s'exprimì cun 108 cunter 85 vuschs tar 2 abstenziuns per la midada. Era il Cussegl dals chantuns ha ditg Gea, quai cun 32 cunter 11 vuschs. Abstenziuns n'hai dà naginas.
