En Svizra na vegnan las prestaziuns ch'èn cuvridas da l'assicuranza obligatorica da malsauns betg finanziadas a moda unitara. En cas da tractaments ambulants (p.ex. tractament medi da chasa) paja la cassa da malsauns. En cas da tractaments staziunars (ospital cun pernottaziun) surpiglia il chantun almain 55% dals custs, en cas da prestaziuns da tgira a chasa u en ina chasa da tgira surpiglia il chantun stgars la mesadad dals custs. Il rest surpiglia mintgamai la cassa da malsauns. Quai procuria per fauss impuls: Pazientas e pazients vegnan magari tractads staziunarmain malgrà ch'i fiss pli raschunaivel ord motivs medicinals e da custs da far in tractament ambulant. Cun midar la lescha ha il parlament decis che tut las prestaziuns da l'assicuranza obligatorica da malsauns vegnan finanziads cuminaivlamain da las cassas da malsauns e dals chantuns tenor la medema clav da repartiziun.
Finanziaziun unitara per evitar fauss impuls
Da nov duain ils chantuns surpigliar tar tut las prestaziuns almain 26,9% e las cassas da malsauns maximalmain 73,1% dals custs. Questa finanziaziun duai reducir fauss impuls sco er promover tractaments ambulants e la collavuraziun da medias, terapeuts, tgirunzas ed apotechers. Cunquai ch'ils chantuns e las cassas da malsauns finanzieschan ensemen tut las prestaziuns, han els in pli grond interess da promover mintgamai quest tractament ch'è medicinalmain il pli raschunaivel e favuraivel. Quai duai er distgargiar las persunas che pajan las premias. Cunter la refurma hai dà in referendum. Il Sindicat svizzer dals servetschs publics ha prendì il referendum perquai ch'el tema effects negativs per il persunal da tgira e persunas malsaunas.
Arguments per ed encunter la revisiun
La gronda part da las partidas politicas e la maioritad dals acturs en il sectur da sanadad sustegnan la midada da la lescha. Ina meglra coordinaziun dal provediment da sanadad mainia ad ina meglra qualitad ed ina meglra tgira da pazientas e pazients.
L'allianza da referendum è da l'avis che la refurma pericliteschia la qualitad en las chasas da tgira e dettia memia bler pussanza a las cassas da malsauns.
Il Cussegl federal sco er il parlament recumondan da dir Gea a la la refurma da la lescha davart l'assicuranza da malsauns. Il Cussegl naziunal è s'exprimì cun 141 cunter 42 vuschs tar 15 abstenziuns per la midada da lescha. Il Cussegl dals chantuns ha medemamain ditg Gea, quai cun 42 cunter 3 vuschs, abstenziuns n'hai dà naginas.
La partida socialdemocratica dal Grischun di Gea a la finanziaziun unitara, cuntrari a la partida naziunala. La PPS dal Grischun percunter di Na a quella proposta, era cuntrari a la partida naziunala, che sustegna il project.