Cun cumplettar las vias naziunalas en tscherts lieus vulan il Cussegl federal ed il parlament meglierar la rait da vias e quai sin ils suandants sis trajects:
- A1 tranter Le Vengeron e Nyon
- A1 tranter Berna-Wankdorf e Schönbühl
- A1 tranter Schönbühl e Kirchberg
- A2 a Basilea (nov tunnel dal Rain)
- A4 a Schaffusa (2. fora dal tunnel Fäsenstaub)
- A1 a Son Gagl (3. fora dal tunnel Rosenberg)
Per quests projects èn planisads custs da 4,9 milliardas francs. Quels vegnan finanziads or dal fond per las vias naziunalas ed il traffic d'aglomeraziun. Cunter quests plans è vegnì prendì il referendum, perquai vegn il project avant il pievel.
A1 – la pli lunga autostrada e l'autostrada cun las pli bleras colonnas
Passa 410 kilometers è l'A1 lunga e maina da la Svizra Orientala en la Svizra Occidentala. Ella n'è betg be la pli lunga autostrada en Svizra, mabain er quella cun las pli bleras colonnas. En tut haja dà l'onn passà 16'279 uras colonnas sin l'A1, quai tenor l'Uffizi federal da statistica. Per meglierar ils lieus neuralgics ha il Cussegl federal proponì al parlament da bajegiar or sis trajects, tschintg da quels èn en la Svizra tudestga ed in en la Svizra romanda. Il parlament ha dà glisch verda al project. In comité che s'engascha per la protecziun dal clima ha dentant lantschà il referendum e rimnà las suttascripziuns necessarias. Il comité da referendum sa cumpona da l'Associaziun traffic ed ambient (VCS) e l'organisaziun per traffic ed ambient «Umverkehr». La Verda sco era la Partida socialdemocratica da la Svizra sustegnan il comité da referendum.
Arguments per ed encunter il project
Cun quest project vulan ils aderents adattar la rait da vias a las pretensiuns actualas e dal futur e segirar il provediment sin las vias naziunalas.
L'allianza da referendum ch'è cunter bajegiar or las vias naziunalas vesa il project sco surfatg e betg cumpatibel cun las finamiras da clima en connex cun la cunvegna da clima da Paris.
Il Cussegl federal sco er il parlament recumondan da dir Gea a la cumplettaziun da las vias naziunalas. Il Cussegl naziunal è s'exprimì cun 107 cunter 87 vuschs tar 1 abstenziun per il project. Il Cussegl dals chantuns ha medemamain ditg Gea, quai cun 33 cunter 6 vuschs tar 5 abstenziuns.
