Strusch abitaziuns d'affittar ed ina quota da segundas abitaziuns da 70%: sche la vischnanca da Flem vul glieud ch'abitescha durant l'entir onn en vischnanca, sto ella reagir. La vischnanca vul perquai cumprar la parcella 784 en il quartier da Plaids e construir là spazi da viver per indigens. Il suveran ha approvà cleramain quests plans cun passa 81%.
Per 45 abitaziuns novas
La vischnanca po uschia cumprar la parcella 784 per in pretsch da 4'073'300 francs d'ina persuna privata. La suprastanza era ida a la tschertga da nov terren da bajegiar. Giaschom adattà han els chattà en il quartier Plaids, datiers da la chasa d'attempads e tgira. Il pretsch da 1350 francs il meter quadratsaja sin livel bass da la fiera d’immobiglias da Flem.
Questa parcella è per nus ina super chaschun.
La surfatscha en la zona da bajegiar ha in grondezza da 3018 m2. Tenor il president communal da Flem giajan ins da quai anora, ch’i haja spazi per radund 45 abitaziuns. Ins haja gia vesì skizzas d’auters projects per questa parcella. Finanziar l’investiziun veglia la vischnanca cun las entradas da las taxas da cumpensaziun che proprietaris pajan che vulan laschar a fit, sut tschertas cundiziuns, emprimas abitaziuns sco abitaziuns da vacanzas, declera Christoph Schmidt.
In project ch'è gia sin buna via è il project «Gion e Flurina» sin la parcella 4002 a Casa d’Uaul. Quest onn cumenzan là las lavurs per la surbajegiada per indigens cun 22 abitaziuns en duas chasas.
Segirar Bargis per purschida turistica
Sper quella fatschenta da stgaffir abitaziuns per indigens han votantas e votants er ditg Gea cumpra da l’ustaria a l’entrada da la Val Bargis, quai er cleramain cun bun 88%. Gia il december passà ha la suprastanza suttascrit il contract cun ils proprietaris actuals. La vischnanca po ussa cumprar questa immobiglia per in pretsch da 1,93 milliuns francs. «Qua tras ha la vischnanca la garanzia che l’ustaria resta vinavant averta e ch’ella stat a disposiziun da stad e d’enviern al turissem», aveva il president communal da Flem argumentà.
Sper quai ha il suveran da Flem er approvà il project da renovar il santeri e construir in ascensur, là hai dà in Gea da bun 65% al credit da 1,4 milliuns francs per la renovaziun cumplessiva dal santeri sco er als 540'000 francs per construir l’ascensur (medemamain approvà cun 65%).
Er il quart project da votaziun ha il suveran approvà e quai cun 73%. I va per la revisiun parziala da la planisaziun locala. Suenter ch’il pievel da Flem aveva refusà il zercladur passà la proposta da la suprastanza, ha quella chattà ina via che lubescha da mantegnair ils ierts e conturns da las chasas. Tenor la nova proposta vegn quai terren exclus da la mobilisaziun obligatorica tenor legislaziun federala e chantunala.
