Il suveran ha approvà cleramain cun 88% Gea la proposta da la vischnanca da metter ensemen las duas parcellas en possess da la vischnanca e da construir sin quellas tranter 25 e 27 abitaziuns novas.
Ulteriurs plans sut la punt da Stenna
Sut la punt Stenna duai dar enstagl d’in hotel abitaziuns per persunal cun ina chasa da persunal administrada. Quai ha Martin Hug, il president communal, confermà envers RTR. Uschia duai vegnir meglierà la situaziun per dimoras per persunal. Quellas mancan numnadamain dapertut en la destinaziun turistica da Flem-Laax-Falera. Plinavant duai dar sin la parcella dal «prau da balluns» ulteriuras parcellas da construcziun per indigens. Qua pudessan era vegnir nizzegiadas las purschidas da la canorta d’uffants e l’access svelt a las scolas, uschia Martin Hug. Uschia daventass Flem in attractiv lieu per abitar e per lavurar.
Ils proxims pass
Sco proxim saja da realisar sin la parcella a Flem Casa d’Uaul la midada da zona, uschia che l’entira parcella è en la zona dal coc dal vitg. Alura saja da stgaffir bunas cundiziuns per pussibels investiders, sco per exempel la cassa da pensiun chantunala, uschia Hug. E la finala saja da guardar che las abitaziuns vegnian era els dretgs mauns, numnadamain a persunas indigenas e famiglias che vulan abitar a Flem.