Flem
Il suveran da Flem ha approvà tut las quatter fatschentas communalas:
- La revisiun parziala da la planisaziun locala en il sectur abitadis: La populaziun da Flem ha ditg Gea a questa fatschenta che cuntegna mesiras per pussibilitar dapli spazi d'abitar per indigens e persunal da firmas – quai cun 73,7%. Cumpareglià cun la varianta ch'è vegnida refusada l'onn passà, è la surfatscha da mobilisar en la versiun approvada reducida per 30% e na tanghescha nagins ierts e clavads pli.
- Cumpra da l'ustaria a Bargis: La vischnanca da Flem po cumprar il «Berghaus Bargis» per 1'930'000 milliuns francs. La fatschenta è vegnida approvada cun 88.1 % tar ina participaziun a la votaziun da 53%. Il manaschi da l'ustaria cun pensiun na surpiglia però betg la vischnanca. Enstagl è previs da dar a fit l'ustaria per garantir la purschida turistica. Planisà è plinavant che la vischnanca optimescha l'infrastructura per passlunghistas e viandants cun integrar gardarobas, fittanza da skis e tualettas publicas en il bajetg.
- Cumpra da la parcella 784 (Burkhardt): Flem po cumprar la parcella 784 (Burkhardt) per 4'074'300 francs (1'350 francs/m²). Il suveran ha approvà la fatschenta cun 81.5 %. En tut 52.5% han purtà lur vusch a l'urna en chaussa. La parcella ha ina surfatscha da 3'018 m² a Flem Vitg. La finamira è da realisar fin a 45 abitaziuns pajablas per indigens e novs abitants. Il plan da la vischnanca è da dar vinavant il terren en dretg da bajegiar ad investurs interessads. Finanziada vegn l'investiziun cun daners da la taxa da cumpensaziun tenor la lescha per abitaziuns secundaras.
- Sanaziun dal santeri Flem: Il suveran ha approvà ils credits da 1'400'000 francs per sanar il santeri da Flem e 540'000 francs per bajegiar in'ascensur per pussibilitar l'access al santeri senza barrieras – quai cun mintgamai radund 65% vuschs en favur da las fatschentas. Ad ils custs per l'ascensur sa participescha la plaiv evangelica da Flem cun dus terzs, respectivamain 360'000 francs.
Cuira
Il plan da bajegiar ina segunda roda da vent a Haldenstein ha fatg in pass enavant. Grazia al Gea dad 83,1% dal suveran po la citad da Cuira crear la basa giuridica en la planisaziun per pudair bajegiar ina segunda ovra d'energia da vent en l'areal Oldis. 38,6% da la populaziun da Cuira han purtà lur vusch a l'urna. Midadas èn previdas en la lescha da bajegiar a Haldenstein, en il plan da zonas ed en il plan general da furmaziun.
Avant che propi pudair bajegiar la segunda roda da vent dovri dentant l'emprim anc la lubientscha per bajegiar ordaifer la zona da bajegiar. Il project è part da la strategia d'energia 2050 da la citad Cuira.
San Murezzan
Il suveran da San Murezzan ha ditg Gea ad in credit da 13,1 milliuns francs per realisar abitaziuns pajablas per indigens. Quai cun 910 vuschs Gea encunter 137 Na – tar ina participaziun da 42%.
L'idea da la vischnanca è da far 19 abitaziuns da 1 ½ enfin 4 ½ stanzas en il sid da l'areal Signal. La purschida vegn ad esser pronta la fin da l'onn 2026.
Glion
La vischnanca da Glion po cumprar la parcella 485 dal quartier Center staziun (areal Maissen) per 5'650'000 francs. Quai ha il suveran decidì cun 68,13% Gea. La populaziun ha cunquai suandà a la proposta dal parlament. Ids a l'urna per decider en chaussa èn bun 37,6%.
L'areal cumpiglia 6'329 m² e duai pussibilitar spazi d'abitar, spazi commerzial e spazi public. A lunga vista ha la citad il plan da dar en dretg da bajegiar ad investurs. Ils custs annuals dal capital ester duain vegnir cuvrids tras entradas da locaziun e suenter cun las entradas dal dretg da bajegiar.
Sumvitg
La vischnanca da Sumvitg po sanar la chasa da scola Rabius. Tranter auter vai per allontanar restanzas da radon, remplazzar il stgaudament d'ieli cun in stgaudament geotermic, installar in cundriz fotovoltaic, modernisar ils cundrizs electrics e sanitars, e sanar fassada, tetgs e plazza da termagls. Il suveran da Sumvitg ha approvà la dumonda da credit da 3'755'000 francs cleramain cun 72% – radund 45% èn ì a l'urna.
Trun
Il suveran da Trun ha decidì da spendrar il Campadi Ogna a Trun ch'è en pitgira finanziala. 251 da las total 367 vuschs han ditg Gea a la fatschenta. Sa participà a la votaziun han en tut 43% da la populaziun. Schegea che la svieuta dal campadi ha pudì vegnir augmentada, tanschia quai tenor il messadi da la vischnanca mo per pajar ils custs resultants. La liquiditad è entant però betg grond'avunda per ademplir las obligaziuns fixadas, sco per exempel d'augmentar successivamain la cumpart vi da l'amortisaziun dal credit communal. Perquai gida uss la vischnanca da Trun.
Arosa
La populaziun d'Arosa ha ditg cleramain Gea – cun 90% – al dretg dad aua da la Plessur ed al reglament da protecziun da la Plessur en connex cun il diever dad aua da l'ovra planisada Pradapunt. Uschia è in impurtant pass per il project surmuntà. In consorzi d'Axpo, Arosa Energia ed IBC Cuira vul realisar l'ovra Pradapunt a la Plessur tranter Litzirüti e Pradapunt.
Panaduz
Il suveran da Panaduz accepta la concessiun per las Ovras electricas Pintrun SA cun 98,25% da las vuschs, tar ina participaziun da radund 28,4%. Quai munta che 674 persunas han ditg Gea e be 12 na vulevan betg dar la concessiun.
Las ovras electricas tutgan a la Axpo Hydro Surselva SA (AHS) ed han duas tschaffadas al Flem ed in lai artifizial cun 23'000 meters cubics – che produceschan en media radund 30 uras gigawatt ad onn. Malgrà che tut sa chatta sin territori da la vischnanca da Trin, è Panaduz pertutgà, perquai che l'aua da l'ovra da Pintrun sbucca en il Rain anteriur e munta uschia 0,8% da la forza idraulica. Panaduz decida uschia davart la concessiun per la nova societad per las Ovras electricas Pintrun che tutga per 80% al maun public (70% vischnanca Trin, 10% chantun GR, 20% AHS).
Persuenter po Panaduz cumprar 10 aczias da l'ovra e calculescha cun tschains d'aua annuals da radund CHF 1'600.
Domat
Il suveran da Domat refusa d'introducir il dretg da votar ed eleger sin nivel communal era per esters ed estras cun permissiun da domicil (permissiun C). Quai cun 77,25% da las vuschs – tar ina participaziun da 37,25%. Tenor il messadi communal avess Domat survegnì 878 votantas e votants dapli. Tenor ils aderents avess in Gea promovì l'integraziun ed identificaziun en la vischnanca. Tenor ils contrahents è la participaziun politica era pussaivla cun la procedura da natiralisaziun – cun dumandar il dretg da burgais.
En il Grischun han fin il 2025 en tut 30 da las da las 100 vischnancas gia approvà quest dretg sin nivel communal – duas l'han però refusà.
Tavau
La vischnanca da Tavau ha approvà omaduas revisiuns da la planisaziun locala. Cun 57,2% din ils da Tavau Gea a l’engrondiment da la plazza da golf per 7'000 meters quadrats. Per realisar quai èsi necessari da runcar radund 5'700 m² dal guaud che duai però vegnir cumpensà realmain. Ils custs dal project porta il Club da golf da Tavau.
La segunda midada da la planisaziun locala è necessaria per in nov quartier d'abitar sin l'areal Valbella. Quai project vegn sustegnì cleramain cun passa 82% da las vuschs. Previdas èn là 150 abitaziuns – radund 100 da questas abitaziuns affittadas e cun cundiziuns favuraivlas. La participaziun per omadus projects è stada tar radund 41,2%.
Malans
Malans ha elegì las autoritads communalas per la perioda dal 2025 fin il 2029. Il president actual – Christoph Caprez (senza partida) – resta vinavant president da Malans fin il 2029. El è vegnì reelegì cun 555 vuschs d'en tut 602 vuschs – 302 eran necessarias per il pli absolut. Ina cuntercandidatura n'hai betg dà.
Nov en la suprastanza ha il suveran elegì Gian Carlo Caviezel. Ils surprastants actuals Paola Giovanoli Calcagno, Armin Kohler e Barbara Meier cuntinueschan tuts fin il 2029. Nov commember da la commissiun da gestiun è Nico Hollenstein (PLD), reelegì èn vegnids Kolb Alex (senza partida) e Senti Diego (PLD).
Vaz
La populaziun da Vaz accepta la revisiun totala da l'ordinaziun davart ils fatgs da sepultura e santeri da la vischnanca. Quai cun 91,85% da las vuschs inoltradas. La participaziun è stada tar 38%. Punct da partenza per questa revisiun è stada la moziun Sigron che pretenda d'era pudair far sepulturas la sonda.