In studi da la Scol'auta spezialisada dal Grischun demussa che bleras abitaziuns primaras a Flem vegnan midadas en abitaziuns secundaras. Las possessuras ed ils possessuras pon far gudogn cun vender ellas sco abitaziuns secundaras.
Tut en tut èn durant tschintg onns 112 abitaziuns vegnidas midadas en abitaziuns secundaras. L'incumbensa per il studi ha il chantun dà. Flem ha numnadamain ina da las pli autas quotas da segundas abitaziuns da la Svizra.
En l'entira Svizra pudess il dumber d’uschenumnadas «conversiuns quietas» muntar a circa 32'000 abitaziuns. Cunquai che la gronda part da quellas midadas capita a dascus mancan però las cifras concretas.
Ils auturs e las auturas dal studi renvieschan ad in problem: A Flem èn il 2022 mo 7 abitaziuns primaras stadas libras, da total 5'200 abitaziuns en la vischnanca. La midada d'abitaziuns primaras en abitaziuns secundaras agraveschia quella mancanza.
Er sche bleras abitaziuns vegnan midadas en abitaziuns secundaras: ina part vegn vinavant dada en locaziun sco abitaziuns primaras, per pretschs pli auts. En il studi scrivan las auturas che indigens ed indigenas possian a lunga vista betg esser ablas da pajar quai. Uschia sa pegiureschia medemamain la mancanza da spazi d'abitar vacant.
Flem vul dar cuntrapais
Ch'i dettia ina mancanza da spazi d'abitar pajabel per famiglias indigenas e persunas singulas è er enconuschent en la vischnanca da Flem. Sco il president communal da Flem Martin Hug ha ditg envers la gasetta Südostschweiz, manchian medemamain abitaziuns per il persunal da purschiders turistics. «La mancanza da forzas spezialisadas en cumbinaziun cun la mancanza d'abitaziuns è tissi per mantegnair ils servetschs e las purschidas.»
Uschia dettia plirs projects ch'èn en planisaziun. Tranter auter duai dar 22 fin 25 abitaziuns per persunas indigenas a Flem Casa d'Uaul, quai renda dentant necessari in'adattaziun dal plan da zonas. Vinavant duain vegnir realisads sut la punt Stenna abitaziuns da persunal e studios. Sulet a Flem manchian passa 100 da talas abitaziuns, sco Hug ha ditg vinavant. Ulteriuras abitaziuns ed ils plans correspundents vegnian ins a preschentar a la populaziun.