Tar la radunanza da delegadas e delegads extraordinaria da la Sanasurselva hai da nov dà ina surpraisa. Il president dal cussegl d'administraziun, Thomas Buchli, dat giu ses post sin mez matg da quest onn. Quai suenter esser stà 10 onns en il cussegl, tschintg da quels sco president. Ses successur daventa il medi Gieri Cathomas, oriund da Sumvitg. Cathomas ha studegià medischina a Turitg.
Dapli tar Gieri Cathomas:
La suprastanza è puspè cumplaina
La radunanza ha elegì Clau Schlosser da Breil e Brigitte Berni da Val S. Pieder unanimamain en la suprastanza da la Sanasurselva. Suenter las extradas da las vischnancas Schluein (16 da schaner) e Glion (20 da favrer) l'entschatta da l'onn è in dals puncts centrals da la radunanza da la Sanasurselva stada l'elecziun da duas novas persunas en la suprastanza.
Resultats dal studi PwC
Cun grond interess èn era vegnìds spetgads ils resultads dal studi PwC ch'ha gì la finamira d'examinar il potenzial da spargn da l'opsital regiunal Glion. Il studi ha giuditgà differentas variantas per in pussaivel manaschi da l'avegnir. Sin fundament da las retschertgas èn ils spezialists da la firma PwC vegnids a la conclusiun che mo duas variantas vegnan en dumonda per l'ospital a Glion. L'emprima fiss in manaschi adattà a quel d'oz, dentant senza la partiziun da naschientscha. L'autra fiss in center da sanadad ambulant senza letgs staziunaris. La suprastanza da la Sanasurselva vegn ad evaluar las propostas e far per mauns da la proxima radunanza da delegads da mez zercladur ina proposta tge purschidas che l'ospital duai porscher en l'avegnir.
Quint annual è sa meglierà
Il quint annual 2024 da l'ospital regiunal Surselva serra cun in deficit da 3,1 milliuns francs – quai tar entradas da 42 milliuns. L'onn 2023 era il deficit anc stà tar 4,5 milliuns e per l'onn 2025 quinta l'ospital anc cun in deficit da 2,1 milliuns francs. Per René Epp, il president da la Sanasurselva, mussa la tendenza dals quints en la dretga direcziun. Quintar cun cifras nairas na saja en il mument dentant betg realistic.