Marcus Beer, il president da la vischnanca da Glion sa retira da la suprastanza da la Sanasurselva, la rait da sanadad da la regiun Surselva. Quai «sin basa dal davos svilup en la suprastanza e sin basa da las decisiuns da persunal da la radunanza da delegads da la SanaSurselva dals 16 da schaner 2025», scriva la vischnanca da Glion en ina communicaziun.
Nus na vegnin betg prendids serius en la suprastanza da la SanaSurselva e la politica da sclauder tscherts impurtants commembers, na pudain nus betg acceptar.
La collavuraziun dal president communal Marcus Beer en la suprastanza da la SanaSurselva na saja il mument betg cunvegnenta. La surprastanza communala haja perquai decis dad ir novas vias. Uschia vegn Glion ad avair ina persuna a la radunanza da delegadas e delegads, ma nagin en suprastanza da la SanaSurselva. La demissiun dal president da Glion e la critica envers la SanaSurselva, fruntan sin nagina chapientscha tar René Epp, il president da la SanaSurselva.
Quai èn decisiuns nunponderadas e quai n’è betg inditgà per ina vischnanca d’ina impurtanza da Glion da simplamain extrar da la suprastanza da la SanaSurselva ed avair nagin en suprastanza.
La vischnanca da Glion saja vegnida udida enfin ussa en la suprastanza. Ella haja prendì la decisiun d’extrar ord la suprastanza. Daco veglian ins extrar da la suprastanza e da l'autra vart surpigliar dapli responsabladad, è la dumonda da René Epp.
Glion sustegna vinavant ses ospital
Sco la vischnanca da Glion scriva vinavant, sajan ins conscient da l'impurtanza dal Spital regiunal Surselva e stettia cumplainamain davos quel. La vischnanca saja perquai vinavant interessada vi dad ina stretga collavuraziun cun la suprastanza da la SanaSurselva. La vischnanca da Glion vegnia vinavant ad esser represchentada en las radunanzas da delagads entras lur delegada Michal Hohl.
Las purschidas da prestaziun da l'ospital regiunal stoppian però vegnir examinadas uschia ch'ins possia prender mesiras effizientas per garantir il provediment da sanadad en la regiun, hai num vinavant.