La SanaSurselva procura puspè ina giada per discussiun. Puspè metta in commember da la suprastanza da la organisaziun ch'è responsabla per il provediment da sanadad da la Surselva a disposiziun ses post. Suenter che Patrick Schaniel (il president communal da Sumvitg), aveva dà giu ses post sco president da la SanaSurselva il december 2024 durant ina sesida da suprastanza e Ralf Schlaepfer (il president communal da Schluein) era extrà da la suprastanza durant la radunanza da delegads da la SanaSurselva ils 16 da schaner da quest onn, banduna ussa era Marcus Beer (il president communal da Glion) la suprastanza. Questa situaziun ha RTR tematisà cun il redactur da la Surselva Reto Pfister.
Reto Pfister, tge succeda propi il mument en il sectur da sanadad en Surselva?
Jau stoss conceder che pli ditg ch'i va e pli abstrus che la situaziun para a mai. Ch'i dat entaifer trais mais trais presidents communals da la Surselva che bittan l'uffizi ch'els han tar la SanaSurselva dal tempel en, è ina vargugna per els sez e mussa tenor mai ch'els n'èn betg abels d'agir sut squitsch per il bun da la populaziun ch'ha elegì els. Mia interpretaziun è ch'i va per emoziuns e cumbats persunals e betg per la chaussa. Sch'ins sa per tge ch'i va, numnadamain per il provediment da sanadad da la Surselva, lura spetgass jau ch'ils presidents communals èn abels da contrahar uschia in cun l'auter ch'i dat era resultats. Il mument mussan atgnamain tut ils segns en direcziun d'ina escalaziun.
Tge èsi lura capità concret che Marcus Beer, il president communal da Ilanz/Glion, ch'è gea il lieu da domicil dal Spital Regiunal Surselva chala?
Atgnamain nagut ch'ins n'avess betg gia savì ils 16 da schaner da quest onn. Quai è stà il datum da la radunanza da delegads extraordinaria da la SanaSurselva. La tractanda principala era d'eleger il successur da Patrick Schaniel ch'aveva dà giu il post da president. Tge ch'è exact succedì quella saira savain nus da RTR mo dal udir perquai che las medias èn stadas sclausas da la radunanza che fiss atgnamain publica. En mintga cas fiss Marcus Beer gugent daventà president da la SanaSurselva, ha dentant pers il cumbat encunter René Epp da Mustér. Quai ha lura, sco nus avain udì, manà ad ina situaziun in pau caotica, perquai che Ralf Schläpfer ha suenter quella elecziun bandunà la radunanza cun communitgar ch'el extreschia per immediat da quest gremi. E sco ils pertutgads sezs han raquintà a mai suenter quella sesida, aveva para er Marcus Beer gia tratg en il tschop per bandunar la sesida. Ed era il vicepresident da la SanaSurselva Dumeni Tomaschett è stà damanaivel da dar giu ses post. Dumeni Tomaschett e Marcus Beer han lura reponderà lur decisiun e la radunanza è vegnida manada a fin. Che Marcus Beer banduna ussa tuttina la SanaSurselva ha per mai da far ch'el n'ha anc betg magunà la terrada da quella saira.
La communicaziun a las medias cun l'argumentaziun daco che Marcus Beer chala è vegnida da la suprastanza communala da Glion. Daco da la vischnanca e betg da Marcus Beer sez?
Quai ch'ins sto en quest cas tegnair dabun a Marcus Beer è ch'el n'ha betg prendì ina decisiun tut persul en il chamberlet, mabain tractà il cas cun la suprastanza. Quella ha sco i para surpiglià l'opiniun dal president communal e communitgà sia decisiun a las medias cun argumentaziuns in pau spezialas. D'ina vart sa lamenta la vischnanca Ilanz/Glion ch'ella na vegnia betg resguardada avunda en lur opiniun e lura communitgeschan els en duas lingias suenter da desister d'exact questa pussaivladad cun extrar or da la suprastanza da la SanaSurselva. En egl datti era ch'i va savens era per il Spital regiunal Surselva. Era là pretenda la suprastanza da Glion ch'i dovria ina examinaziun da la situaziun actuala. Sco nus savain è questa examinaziun dentant instradada ed en elavuraziun, pia ina pretensiun per insatge ch'i dat gia. Resumà pon ins dir che la suprastanza communala da Glion n'è betg cuntenta cun la situaziun actuala, quai per part cun raschun. Tge ch'ins sto dentant era dir è, ch'ella è sa manevrada sezza en questa situaziun.
Tge munta questa situaziun ussa per l'avegnir dal provediment da sanadad da la Surselva?
Per mai stat il plan da metter l'entir provediment da sanadad sut in tetg il mument sin pli che chommas falombras. Dad ina vart avain nus la SanaSurselva ussa cun trais enstagl da tschintg commembers en suprastanza e cun il president René Epp che vul dar gas quai che pertutga la restructuraziun da l'ospital e da metter en pe la rait da sanadad Surselva. Da l'autra vart avain nus las vischnancas da Glion, Schluein e Laax ch'èn il mument super criticas envers la SanaSurselva e che vegnan strusch ad acceptar propostas da restructuraziun che n'èn betg en lur senn. Sch'ils presidents communals da la Surselva na vegnan betg immediat da metter da la vart lur resentiments persunals e da far quai per quels ch'els èn atgnamain vegnids elegids, numnadamain per represchentar la populaziun, lura giuditgesch jau il privel il mument fitg grond ch'il provediment da sanadad da la Surselva vegn a patir sut questa situaziun e ch'il plan da metter tut ils servetschs da sanadad sut il tetg da la rait da sanadad Surselva è fitg periclità.
Reto Pfister
Producent Surselva / GR Central