Il davos da favrer 2024 è la Rait da sanadad Surselva vegnida fundada. In mez onn pli tard, l'october 2024, ha il mainafatschenta Marco Salzgeber entschet cun ses engaschi. La finamira è che la Rait da sanadad surpiglia a partir dal 2027 l'organisaziun ed administraziun da las instituziuns che sa participeschan.
Progress e sfidas
Il mainafatschenta Marco Salzgeber ha emprendì d'enconuscher intensivamain las otg instituziuns participantas. Quai èn las chasas da vegls Sogn Giusep a Cumpadials, la Casa s. Martin a Trun, la Pumera a Glion, il Steinhauser Zentrum a Sursaissa e la chasa da vegls a Val Sogn Pieder, plinavant las duas organisaziuns da Spitex da la Cadi e da la Foppa ed l'ospital regiunal da la Surselva.
Ils responsabels han identifitgà sis temas centrals per la colliaziun. Quels temas pertutgan finanzas, informatica, persunal, acquisiziun, tgira e gestiun da qualitad. La finamira è d'armonisar ils process relevants per il manaschi operativ fin il 2027.
Armonisaziun finanziala e structurala
In tema central è l'armonisaziun dals quints annuals da las instituziuns – che n'è fin ussa betg vegnida fatga. Enstagl è vegnida fatga ina analisa vasta che serva sco basa per il model operativ futur. La colliaziun da l'avegnir duai nizzegiar effects da sinergia ed effects da cascada per garantir ina provediment da sanadad persistent.
Per nus èsi impurtant che tut las instituziuns sajan en in stadi stabil. Qua datti segir anc pensums per las instituziuns. Jau sun dentant da buna speranza che tut las instituziuns dumognan quels pensums.
Integraziun e svilup dal persunal
La creaziun d'in pool da persunal vegn discutada per utilisar il persunal pli effizientamain. Quai duai vegnir sustegnì tras purschidas attractivas da furmaziun cuntinuada e models da lavur. L'integraziun da las instituziuns ha l'intent da cuntinuar ad attrair e mantegnair persunal qualifitgà.
Perspectivas futuras
Malgrà las turbulenzas actualas en la structura surordinada da la SanaSurselva resta la finamira da concepir il provediment da sanadad en la regiun en moda persistenta.
La finamira è ch'il success dal project pudess era motivar las ulteriuras instituziuns da sa participar a la Rait da sanadad Surselva, sumegliant ad auters models reussids en il chantun Grischun.
Suenter las lavurs da preparaziun san las otg instituziuns che participeschan actual a la Rait da sanadad Surselva anc ina giada decider l'onn 2026 definitiv e final sch'ellas vulan restar en la rait da sanadad.