La Societad da musica da Danis/Tavanasa ha actualmain 19 commembras e commembers. Cun quai è ella la musica cun ils pli blers commembers en la vischnanca da Breil. Durant nossa visita èn els vi da trenar da marschar, perquai ch'els sa preparavan da sa participar la festa chantunala da musica a Claustra a la concurrenza cun puncts. Els han bain gidantras e gidanters che sa gidan per questa festa, ma guardà nà da la grondezza èn els avunda il mument. Quai n'era dentant betg adina uschia. Anc avant in pèr onns mancava ad els president e dirigent il medem mument. Tras quai eran els sfurzads da chattar soluziuns e sa discurrer cun tschellas duas societads da musica.
Ina fusiun cun tschellas duas societads da musica en vischnanca, quella da Breil/Dardin ed Andiast, è era stà sin maisa. Ma cunquai ch'els han lura tuttina anc chattà in nov president e dirigent, n'è quai lura betg daventà realitad. Che fusiuns n'èn betg uschè bainvesidas – ha da far cun experientschas ord fusiuns precedentas, sco quai ch'il president actual Ermano Tuor declera:
Tge vul fusiunar, lura vegnan forsa destruidas trais musicas. Lura pli gugent far uschia sco nus faschain ussa.
Quai vesa era il president da la Societad da musica Breil/Dardin Adrian Seiler uschia. La fusiun da Breil cun Dardin ha numnadamain mussà effects sumegliants – Ils emprims onns funcziunava quai bain, ma silsuenter hajan zic a zic musicists chalà. Era els san da tge ch'els discurran. Er els han da cumbatter cun la sminuziun da commembers. Eran els anc en 35 l'onn 2016 ha quai dà silsuenter ina extrada suenter l'autra, fin ch'els eran il 2022 be pli en 12. Ils motivs per questa sminuziun na sajan dentant betg stads la fusiun – mabain differents sco per exempel extrar pervi dad ir a studegiar u abitar en in auter lieu. Ussa l'onn 2024 èn els sa revegnids in zic da quai, ed èn actualmain en 17 cun duas absenzas.
Nus avain gì la fusiun cun Dardin anno 1997. Lura eran nus massa commembers – ed in, dus onns suenter eran nus puspè sin il medem diember.
Ils pli paucs commembers ha la Societad da musica Andiast. Els èn be pli en 9. Ma era per els na vegn ina fusiun betg en dumonda, sco quai ch'il president Curdin Vincenz scriva ad RTR.
Uschespert che la musica n'è betg pli en il vitg, n'è la motivaziun per blers betg pli gronda.
Ed apaina che la musica vegia avunda commembers dettia da quels ch'extreschan suenter la fusiun, perquai ch'els na sa sentian betg pli responsabels per l'existenza da la musica, scriva Vincenz. La fin haja ina musica fusiunada forsa ils emprims onns dapli commembers, ma deplorablamain betg pli ditg a lunga vista, explitgescha Curdin Vincenz vinavant.
Uschia han las trais musicas da la vischnanca da Breil tuttas fatg atgnas experientschas cun fusiuns. Fusiunar na vegn il mument betg en dumonda, tuttas trais societads da musica èn cuntentas sco ch'igl è il mument ed emprovan mintgina il ses e meglier, da mantener quai ch'ellas han.
