Per pudair realisar ils differents events dovri bleras persunas voluntarias ch’èn prontas da gidar e sustegnair las uniuns durant ils dis d'occurrenza. Saja quai per exempel tar la construcziun da la tenda, tar il lavurar davos la bar u en cuschina. La glista da lavurs è lunga. Betg adina, ma savens han ils organisaturs e las organisaturas dentant fadia da chattar ils teams voluntaris. Quai sentan era las uniuns or da las regiuns.
Era tar la festa da «600 onns Ligia Grischa» a Trun, vegn duvrà blers mauns gidanters. Per realisar las differentas occurrenzas festivas che cuzzan l'entir onn, dovri, sco il president communal Dumeni Tomaschett di, var 300 persunas voluntarias che sa gidan. I sa tractia da massa convischinas e convischins dal conturn ch'èn pronts da lavurar durant las festivitads. La vischnanca da Trun n'haja betg gì fadia da chattar persunal voluntari.
En la vischnanca da Trun n’avain nus en general betg difficultads da chattar gidanters e gidantras. Las abitantas ed ils abitants èn fitg engaschads tar nus.
Betg sco ultim saja quai er ina festa en ina furma speziala che n'ha betg lieu mintg'onn. Sco Dumeni Tomaschett di, saja il plaschair e la dumonda d'astgar gidar durant quest eveniment fitg gronda.
Sumeglianta è la situaziun dals voluntaris er tar l'occurrenza purila «Agrischa» ch'ha lieu fin l'avrigl a Grüsch. Sco quai ch'il president dal comité d'organisaziun Jöri Luzi manegia, dovrian era els ina pluna glieud che s'engaschia durant quests dus dis da fiera. Tut en tut 800 persunas. Grazia a las uniuns purilas è ina gronda truppa cun lavureras e lavurers voluntaris spert sa cumponida.
Tar nus na sto era nagin lavurar gratuit. Nus pajain ina pitschna paja per ura ed era il da mangiar vegn surpiglià da nus.
![Jöri Luzi, president dal OK da l'Agrischa Mann sitzt auf Stuhl](https://www.rtr.ch/static/cms/images/960w/069fc6.jpg)
Ma betg dapertut va tut senza problems. Sco quai che Verena Rhyner, la responsabla da persunal dal BüGla, dal «Bündner Glarner Turnfest» manegia, hajan els pli grondas difficultads da chattar persunal voluntari. Per la festa da sport, che ha lieu il zercladur, han els gia cumenzà l'atun passà a far reclama. En tut dovran els bun 1'000 gidanters e gidantras e tenor stan actual manca ussa anc radund 1/4 dal persunal. Verena Rhyner è optimistica, ma per ella èsi donn che l'interess manca tar ils blers e las bleras.
Jau crai ch’il stil da viver è simplamain sa midà ils ultims onns. Betg il davos èn ils blers anc en autras uniuns ed uschia manca savens il temp e l’interess.
I para pia dad esser ina dumonda da l’interess ed er dal temp e betg il davos dependa er in pau da l’organisaziun. Quell'experientscha ha era Katharina Luzi fatg, ina da las organisaturas da la festa da musica a Claustra.
A l'entschatta avain nus dumandà memia baud las uniuns e las persunas voluntarias, perquai ch'il termin era anc memia lunsch davent, e pli tard èsi stà memia spontan per ellas.
Ma quai ch'haja la finala gidà, sajan las relaziuns persunalas cun collegas ed amis. Uschia hajan els chattà bleras persunas voluntarias. Katharina Luzi è plain speranza da pudair cumplettar la glista da las gidantras e gidanters anc fin che la festa da musica cumenza il zercladur.
Quest onn èn las uniuns pli u main anc vegnidas da mitschar. Ma tut tenor il svilup, poi bain esser che quest cumbat e questa mancanza da persunal daventan pli e pli fitg normalitad en il futur.