La fundatura e presidenta da MOMO Valentina Montalta s’engascha cun corp ed olma per l’uniun. Ella haja vulì dar insatge enavos a la societad e surtut als uffants. Era tar nus stoppian tscherts uffants passentar temp en l’ospital, n’importia betg daco.
Schegea che tut las purschidas medicinalas sajan lura cuvridas, na restia savens betg temp per dar cumpognia a quests uffants, declera Valentina Montalta. Perquai ha MOMO sur onns ora cumenzà ad instradar ina collavuraziun cun l’ospital chantunal a Cuira.
MOMO paja las uras supplementaras da lavur
L’idea è simpla: sch'in uffant n’han nagin che mira d'el - forsa perquai ch’ils geniturs han in discurs cun ils medis u anc dapli uffants a chasa – mira l’uniun ch’ina persuna passenta temp cun quai uffant.
Per vegnir da far quai gidian la scolasta e la scolasta da scolina l'uniun. Las scolastas enconuschian gia ils uffants en l’ospital. Da princip sajan ellas pajadas dal chantun, meglier ditg da l'ospital. Ma cura ch'i dovria lur engaschi e temp supplementar indemniseschia l’uniun MOMO las scolastas da l'ospital cun daners da lur cassa.
La collavuraziun cun l’ospital saja propi nuncumplitgada e cun ils meds da communicaziun d’oz er effizienta, di la presidenta Valentina Montalta.
Nova gruppa per pudair regalar anc dapli temp
Surtut las malsognas psichicas èn s’augmentadas ils ultims dus onns. Era uffants u giuvenils èn savens pertutgads. Perquai hajan ins dacurt fundà ina gruppa supplementara cun voluntarias e voluntaris che fan visitas en l’ospital. Mintgatant tanschia ina persuna nunenconuschenta ch'ha simplamain temp per s’avrir e pudair discutar sur da problems, sco per exempel la malsogna bulimia.
Ina persuna ch'è simplamain là e dettia cumpognia, senza pretender insatge, obligaziuns u spetgar in dialog. Quai gidia savens la giuventetgna da pudair s’avrir, declera Valentina Montalta la lavur da la nova gruppa e surtut il niz ch’ella ha.
Ins stoppia dir, che cun la mancanza da persunal en l’ospital, saja lur lavur fitg appreziada da tuts, tant dal persunal da l’ospital sco era da las pazientas ed ils pazients. Quai fetschia bain da vesair.
Daners da sponsurs e donaturs
Sco commembra u commember pajan ins ina contribuziun annuala e saja bain infurmads sur da las activitads da l’uniun. Esser commember na saja betg lià vi d'ina obligaziun da sa participar activamain a l’intent da l’uniun – pia dar temp ad uffants. Quai che quintia surtut saja che l’engaschi vegnia da cor, di Valentina Montalta.
Per fadiar daners, haja l'uniun mintg’onn durant la festa da la citad da Glion in stan. Els hajan era fitg buns donaturs che sustegnian l'uniun en bleras furmas, uschia ch’il sustegn saja propi fitg grond. L'uniun dumbra dapli che 100 commembras e commembers che dattan cun lur engaschi tar l’uniun MOMO cumpagnia ad uffants en ospitals.
