L'agressivitad e la criminalitad d'acquisiziun en la scena da drogas a Cuira èn s'augmentadas. Medemamain la dischintegraziun da persunas dependentas, scriva il cussegl da la citad. Per far frunt a quests svilups haja il cussegl da la citad da Cuira accelerà la realisaziun da la strategia da la politica da dependenzas e da drogas. La Sägenstrasse 75 è vegnida definida sco lieu pussaivel per in local da consum surveglià.
La situaziun sa pegiurescha
La situaziun da drogas actuala a Cuira saja desolata per persunas malsaunas da dependenza e per la populaziun ina gronda chargia. Il cussegl da la citad da Cuira è conscient da quai e prioriseschia perquai la realisaziun svelta da las mesiras preschentadas al cussegl communal il zercladur 2022. Ina mesira centrala da la strategia urbana è il spazi da consum surveglià che duai vegnir realisà tranter ils onns 2024 e 2026 e che duai vegnir integrà en il nov post chantunal da contact e da consultaziun.
Ils puncts centrals da la citad da Cuira:
- cumbatter la negligientscha tras purschidas che correspundan als basegns
- augmentar la segirezza tras ina repressiun pli intensiva
- meglierar la reputaziun tras ina communicaziun activa
- best practice en il sectur da la prevenziun da dependenza tras il program «Communities That Care (CTC)».
Purschidas adattadas als basegns
Locals da consum accumpagnads datti en Svizra dapi plirs decennis tant en grondas citads sco er en citads da grondezza mesauna sco per exempel Soloturn, Schaffusa u Olten. Quels porschan a persunas malsaunas da dependenza in lieu segir ed igienic per consumar substanzas. Uschia distgargian els er il spazi public dals effects negativs dal consum da drogas sco il consum visibel ed il littering. L'effect da spazis da consum è cumprovada en spezial, sch'els èn integrads en in post da contact e da consultaziun cun servetschs da cussegliaziun e da sanitad ch'èn facilmain accessibels. La strategia urbana prevesa perquai ina colliaziun dal spazi da consum cun il post da contact e da consultaziun chantunal che sa sviluppa da nov.
Focus sin in local da consum surveglià
En emprima lingia accelerescha la citad da metter a disposiziun in'immobiglia per il spazi da consum surveglià. Ins haja examinà e valità circa 25 immobiglias sco lieus pussaivels per questa nova purschida simpla e nunbirocratica. En il rom da questa evaluaziun è l'immobiglia urbana en la Sägenstrasse 75 sa mussada sco la pli adattada ed ella è gia vegnida libra per l'utilisaziun sco local da consum. Decisivas per l'elecziun èn stadas la posiziun, la surfatscha utilisabla e la disponibladad.
L'emprima prioritad vegnia dada a la segirezza sin l'areal ed en tut il quartier. Sco en autras citads cun localitads da consum survegliadas vegnia creà er a Cuira in barat regular cun la populaziun residenta cunfinanta ed in cler management dals recurs. Quai vegn fatg a chaschun da scuntradas, nua che observaziuns pon vegnir barattadas directamain cun las persunas responsablas sco era cun ina pussaivladad d'annunziar directamain sur ina hotline.
Actualmain vegn il concept dal post da contact e da consultaziun accordà cun quel da la localitad da consum. Ultra da quai dovri scleriment davart la finanziaziun dals custs d'edifizis e da gestiun. La planisaziun, las surdadas da lavurs per l'avertura da l' areal duran, inclusiv il temp da construcziun, circa trais mais. Ina realisaziun è realistica a partir da la stad 2024.
Meglierar la situaziun d'abitar
Ina situaziun d'abitar reglada è in factur impurtant per stabilisar persunas cun malsognas da dependenza e d'ulteriuras gruppas da persunas periclitadas. A Cuira è il dumber da persunas senza ina situaziun d'abitar reglada quasi sa dublegià entaifer in onn ed è s'augmentà sin passa 40 persunas. Ina part da quellas sa chatta era la notg en il spazi public cun consequenzas negativas per la populaziun.
Ils motivs principals per la scena da 24 uras èn d'ina vart l'effect ferm da stimulants (p.ex. cocain) sco era la mancanza pli e pli acuta da spazi d'abitar favuraivel. L'abitar reglà e confurm als basegns po prestar ina contribuziun impurtanta per distgargiar il spazi public e cumbatter la situaziun da persunas senza tetg.
Per accelerar quest process ha la citad incumbensà da far in'analisa da basa davart il tema «Abitar en situaziuns d'urgenza a Cuira». Il cussegl da la citad infurmescha previsiblamain quest october davart ils resultats e davart ina proposta da proceder che resulta da quai. Sa basond sin quai vegnia la citad a s'engaschar tar il chantun per che largias da purschida en quest sectur vegnian serradas cun gronda prioritad.
Best practice en il sectur da la prevenziun
En collavuraziun cun la fundaziun svizra da sanadad Radix ha la citad realisà durant l'onn da scola passà ina retschertga da giuvenils en il rom dal program «Communities That Care (CTC)». Sin basa da quests resultats vegn elavurà actualmain in plan d'acziun specific per la citad da Cuira per midar en moda positiva las cundiziuns da viver dals uffants e dals giuvenils. Sco mesiras immediatas èn gia vegnids lantschads in pilot dal program d'integraziun e prevenziun «LIFT» sco era cun las uniuns da sport ina purschida che n'è betg orientada al cumbat da concurrenza per giuvenils.
Or da l'archiv:
