Il cussegl communal da Cuira è s'exprimì per in local da consumar drogas accumpagnà a Cuira, quai cun 15 per e 5 vuschs cunter. Uschia vegni a dar per trais onns in project da pilot limità per 1'080'000 francs. Suenter ils trais onns project da pilot saja il giavisch, ch'il chantun surpiglia il local da consum, ha ditg il cusseglier da la citad Patrik Degiacomi.
Concret vai per in nov local da consum accumpagnà, nua che persunas dependentas pon consumar drogas. Uschia duess la situaziun dals consuments vegnì meglierada e per il public duessi vegnir pli pauc visibel, communitgescha la citad. En in'emprima fasa duai dar in manaschi da pilot da trais onns. Quel custa radund in milliun francs. A la proxima seduta dal cussegl communal, la gievgia, vegn questa strategia discussiunada. Il cussegl da la citad vul cumbatter la negligientscha da persunas ch'èn dependentas da drogas, augmentar la segirezza e la qualitad da domicil, sco era meglierar la prevenziun da dependenzas.
Situaziun precara en il «Stadtgarten»
La dimensiun da la scena da drogas visibla en il «Stadtgarten» saja dapi onns adina circa tuttina. La situaziun per pertutgadas e pertutgads saja precara e per ils abitants ed abitantas ina perdita da qualitad. Tras il local da consum na spetga la citad da Cuira betg che tut ils problems vegnian eliminads, però vesa il cussegl da la citad la pussaivladad che quel haja in effect positiv.
Differenzas tranter chantun e la citad
Per la citad da Cuira na poi betg ir svelt avunda. Il giavisch suenter in local da consumaziun e gronds. Il chantun Grischun che fiss atgnamain responsabels da crear uschia in local, metta dentant auter sias prioritads. En ses focus è tranter auter da rinforzar il project «Streetwork» che visita e sa gida cun las persunas dependentas. Plinavant less el spustar il post da contact e consultaziun pli amez la citad.
Igl è dentant ina gronda svida da chattar ina localitad adattada.
Uschè svelt ch'ins haja dentant chatta in lieu vul la citad da Cuira pender vidlonder il local da consumaziun giavischà. Quel na vegn dentant betg finanzià dal chantun, mabain da la citad sezza. Il local duai vegnir manads sco project da pilot da trais onns. Sco Patrik Degiacomi, cusseglier da la citad di, sperian els ch'il chantun surpiglia suenter quels trais onns lura l'incumbensa da tgirar il local da consumaziun.
Situaziun en l'entir chantun
Tenor il sistem da monitor da dependenzas svizras, consumeschan 3% da la populaziun grischuna ina giada en il mais cannabis. La mesadad consumescha vitiers anc autras substanzas illegalas. Quai mussan las cifras dal 2017. Dentant betg mo las drogas illegalas fissan in problem, mabain era las legalas, sco alcohol, di Susanne Gadient, la directura da l'uffizi dal servetsch social. Tenor ella fissan quai quellas che fetgian il pli grond donn.
Ord l'archiv
La strategia da drogas en il chantun Grischun ubain en la citad da Cuira è adina puspè in politicum.