En citads grondas sco Genevra, Basilea Turitg però er a Cuira vegni adina consumà dapli drogas en il spazi public. La consequenza sajan mini-scenas da drogas, constatescha l'organisaziun «Dependenza Svizra». Quest svilup stettia tranter auter en connex cun la fitg auta disponibladad da cocain.
La citads stoppian perquai adattar lur politica da drogas. Sulet a Cuira saja sa sviluppà ils ultims mais ina scena averta cun passa 100 persunas dependentas da drogas. Questa gievgia ha la citad perquai annunzià ina conferenza da medias per annunziar novas mesiras.
Alloschament il quità principal
Er sche la situaziun na saja anc betg cumparegliabla cun il Platzspitz a Turitg, moran mintg'onn radund 100 persunas vi da las consequenzas dal consum. Per l'ina hajan las persunas dependentas emprendì da sa dustar meglier, per l'autra ageschan ospitals ed uffizis pli concertà.
Il problem restia dentant accut. Las persunas dependentas vivan a l'ur da la societad, n'hajan nagin tetg sur il chau e nagina lavur. Vitiers vegnia il stress da chattar drogas. Ils experts e las expertas dal «dependenza svizra» pretendan perquai dormitoris ed alloschaments nua che las persunas possian durmir e sa revegnir.
Adattà al tema
Che Cuira ha ina scena da drogas averta n'è nagin secret. La situaziun vegnia dentant en plirs secturs adina pli precara, tenor cussegl da la citad Cuira Patrik Degiacomi. Cun in local da consumaziun vegnia ins da controllar meglier il traffic pitschen cun drogas e il consum. RTR ha tut sut la marella la situaziun.